Дунёдаги энг кекса альпинист — непаллик Мин Баҳодур Шерхон 6 майда Эверестга чиқишга яна бир бор уринаётган вақтда юрак хуружидан вафот этди. Бу ҳақда Непал туризм департаменти бош директори Динеш Бхаттарай хабар берди, деб ёзмоқда «ТАСС».
«Шерхон бугун Эверест чўққисининг база лагерида юрак хуружидан вафот этди. Унинг танаси эртага вертолётда Катмандуга экспертиза ўтказиш учун етказилади», — деб баёнот берган департамент раҳбари.
Бу йил чўққига кўтарилиш учун лицензия олган 317 альпинист қаторида бўлган таниқли непаллик альпинист апрель ойининг охирида Эверестнинг база лагерига етиб келган. У сайёрадаги энг баланд нуқтанинг энг кекса забт этувчиси мақомини ўзига қайтариш учун акклиматизациядан ўтган. Шерхон 2008 йилда 76 ёшида ушбу мақомни қўлга киритган. Бироқ беш йил ўтгач, япониялик 80 ёшли альпинист Юичиро Миура унинг рекордини янгилаган.
Изоҳ (0)