2 май куни Ўзбекистондаги Евроиттифоқ делегацияси раҳбари Эдуардс Стипрайс Президент Шавкат Мирзиёевга ишонч ёрлиқларини топширди. 4 май куни у Европа Иттифоқи элчиси сифатида биринчи матбуот анжуманини ўтказди, деб хабар беради «Новости Узбекистана».
ОАВ вакиллари олдидаги чиқишида Стипрайс делегациянинг 2016 йил сентябридан буён амалга оширган ишлари ҳақида батафсил гапириб берди.
Унинг фикрича, Ўзбекистон раҳбарияти мамлакатни ташқи дунё учун очиқроқ қилиш йўлида ишонч билан қадам ташламоқда. Бундай ёндашув Ўзбекистон ва Евроиттифоқ ҳамкорлигини янада фаоллаштириши мумкинлиги таъкидланди.
Элчи сиёсий ҳамкорликнинг муҳимлигини қайд этиб ўтиб, Ўзбекистон ҳукумати билан мулоқот шиддат билан кенгайиб бораётганини мамнуният билан таъкидлади. Бунинг тасдиғи сифатида Евроиттифоқ расмий шахсларининг Ўзбекистон вазирлик ва идоралари вакиллари билан мунтазам алоқалари келтирилди.
«2016 йили бизнинг икки томонлама савдо балансимиз кам миқдорда тушиб, 1,8 миллиард еврони ташкил этди (2015 йилги кўрсаткич — 1,837 миллиард евро). Евроиттифоқ Ўзбекистоннинг беш энг йирик савдо ҳамкори қаторига кириб, Хитой, Россия ва Қозоғистондан кейин тўртинчи ўринни эгаллади. Европа инвесторлари томонидан Ўзбекистонга бўлган қизиқиш жуда катта, бунинг тасдиғи сифатида бу ерга турли мамлакатлар ишбилармон жамоатчилиги вакилларининг Ўзбекистонда бизнес юритиш имкониятларини ўрганиш мақсадида мунтазам равишда амалга ошираётган ташрифларини тилга олишимиз мумкин. Евроиттифоқ Ўзбекистон ҳукумати томонидан 2017–2021 йиллар учун ривожланиш Стратегияси доирасида режалаштирилган иқтисодий ислоҳотларни қўллаб-қувватлайди», — деди Стипрайс, «Новости Узбекистана» мухбирининг иқтисодий ҳамкорлик истиқболлари ҳақидаги саволларига жавоб бераркан.
«Мамлакатда бугун бизнес юритишдаги мавжуд тўсиқларнинг бартараф қилиниши ишбилармонлик ва инвестицион иқлим учун яхши шароитларни яратади. Бу, ўз навбатида, кўплаб Европа фирма ва компанияларининг Ўзбекистон бозорига кириб келишига хизмат қилади ва савдо-иқтисодий ҳамкорлигимизда яхши акс этади», — сўзида давом этди Стипрайс.
«Ўзбекистонда мавжуд валюта сиёсати инвестициялар жалб этилишини тўхтатиб турибди. Валюта сиёсатидаги ўзгаришлар европалик инвесторлар учун жиддий ишора бўлиб хизмат қилади», — деб хулоса ясади элчи.
Изоҳ (0)