Европа Иттифоқи Ўзбекистонни 2017—2021 йилларда ривожлантириш Ҳаракат стратегиясини қўллаб-қувватлашга тайёр. Бу ҳақда мамлакатда ташриф билан бўлган Евроиттифоқнинг Марказий Осиёдаги махсус вакили Петер Буриан маълум қилди, дея хабар беради «Газета.uz».
«Биз Ҳаракат стратегиясини катта қизиқиш билан ўрганиб чиқдик. Бунга муносабат билдириш, ҳамкорликдаги дастур ва лойиҳаларимизда ҳужжатнинг йўналишларини акс этттириш ниятидамиз. Евроиттифоқ Ўзбекистоннинг қўшнилари билан фаол ҳамкорликни йўлга қўяётганини қадрлайди. Мазкур янги вазият Евроиттифоқнинг минтақавий ҳамкорлик бўйича лойиҳаларига ижобий таъсир кўрсатади», — таъкидлади Петер Буриан.
Лойиҳалар орасида сифатли таълимни қўллаб-қувватлаш, қонун устуворлиги ва хавфсизликни таъминлаш, барқарор ривожланишга кўмак ва табиат ресурсларидан оқилона фойдаланишга қаратилган ҳужжатлар мавжудлиги қайд этилди.
Яқин ҳафталар мобайнида 21,5 миллион евро миқдоридаги Қишлоқ хўжалигини ривожлантириш дастурини молиялаштириш юзасидан келишув имзоланиши кутилмоқда. Шунингдек, кичик бизнес ва хусусий тадбиркорлик корхоналари раҳбарларини менежментга ўргатиш дастури ҳам давом эттирилади.
Изоҳ (0)