АҚШ президенти Дональд Трамп маъмурияти 26 апрель куни ноқонуний иммигрантлар ҳаракатларидан жабр кўрганларга ёрдам бериш учун марказ очди. АҚШ фуқароларининг кўпчилиги ушбу ташаббусни кескин танқид остига олди. Уларнинг фикрича, марказ қонуний иммигрантларнинг нафсониятига тегади, шунингдек, ирқчилик ва тоқатсизликни келтириб чиқаради, деб хабар бермоқда Meduza.
Шунингдек, марказ қошида жабрланганларнинг шикоятларини қабул қилиш учун қайноқ линиялар ташкил этилди. Миллий хавфсизлик вазирлиги марказ миссиясини тавсифлашда alien сўзини қўллаши чалкашликлар келтириб чиқармоқда, негаки бу сўз фақат «бегона» эмас, балки «ўзга сайёралик» деган маънони ҳам англатади.
Шу боис президентнинг миграцион сиёсатидан норози фуқаролар қайноқ линияга қўнғироқ қилиб, киноя тарзида ўзга сайёраликлар, Супермен ва ҳатто магллар устидан шикоят қилмоқда.
Айримлар операторларга НУЖ тарафидан ўғирлаб кетилганини, яна баъзилар бошқача фантастик ҳикояларни айтиб бермоқда. Бу ишни амалга оширган гувоҳлардан бирининг сўзларига қараганда, оператор унинг сўзлари ҳазил эканлигини тушунмай, текширув ўтказишга ваъда ҳам берган.
АҚШ миграцион хизмати ходимларининг таъкидлашича, қайноқ линиялар ўзга сайёраликлар ҳақидаги қўнғироқлар билан бандлиги боис чинакам жабрланувчилар билан боғланишнинг имконияти бўлмаяпти.
Изоҳ (0)