Ўзбекистонликларнинг қарийб 91 фоизи оилаларнинг ажрашишига салбий муносабатда

«Ижтимоий фикр» жамоатчилик фикрини ўрганиш маркази оила ва никоҳ, фарзанд тарбияси, фуқароларнинг ижтимоий мақсад ва интилишларига бағишланган сўров ўтказди, дея хабар бермоқда ЎзА.

Қайд этишларича, сўровда Ўзбекистоннинг барча ҳудудларидан турли аҳоли қатламлари вакиллари иштирок этган. Сўровномада иштирок этган респондентлар сони ҳақида батафсил ахборот берилмаган.

«Ўтказилган мониторинг аҳолининг катта қисми (90,7 фоизи) оилаларнинг ажралишига салбий муносабатда эканини кўрсатди», — дейилади ЎзА ахборотида.

Фуқаролар оила бузилишига асосан ёшларнинг оилавий ҳаётга тайёр эмаслиги, уларда ҳаётий тажриба етишмаслиги, бир-бири билан муроса қила билмаслиги, келишмовчиликларнинг олди олинмаётгани, вақтинчалик моддий қийинчиликлар, эр-хотиннинг феъл-автори бир-бирига мос келмаслиги сабаб бўлаётганини қайд этган.Сўров иштирокчиларининг фикрича, «турмуш қураётган ёшларнинг муҳаббати, бир-бирини ҳурмат қилиши, ишониши ва қўллаб-қувватлаши, шунингдек, миллий анъана, урф-одатларимиз ва одоб-ахлоқ нормаларига риоя этиши бахтиёр ва мустаҳкам оила ташкил топишида муҳим омиллар ҳисобланади».

«Дарё»нинг Telegram’даги расмий канали — @toshqindaryo’га аъзо бўлинг!