«Ижтимоий фикр» жамоатчилик фикрини ўрганиш маркази оила ва никоҳ, фарзанд тарбияси, фуқароларнинг ижтимоий мақсад ва интилишларига бағишланган сўров ўтказди, дея хабар бермоқда ЎзА.
Қайд этишларича, сўровда Ўзбекистоннинг барча ҳудудларидан турли аҳоли қатламлари вакиллари иштирок этган. Сўровномада иштирок этган респондентлар сони ҳақида батафсил ахборот берилмаган.
Сўров натижаларига кўра, «йигитлар 24—25, қизлар 21—23 ёшда оила қуриши мақсадга мувофиқ, ёшлар оила қуришдан аввал таълим олиши, касб эгаллаши, иқтисодий жиҳатдан мустақил бўлиши зарур», деган фикрдаги фуқаролар кўпайиб бормоқда.
Сўровни ўтказиш жараёнида фуқаролар ёшларни турмушга тайёрлаш ва бу билан ота-оналар шуғулланиши лозимлигини таъкидлади. Ота-оналар мустаҳкам оила қандай бўлиши, эр-хотин бир-бирига ва фарзандларига қандай муносабатда бўлиши, никоҳ-оила масаласига тааллуқли ҳолатларда қандай йўл тутиши кераклигини ўзлари мисолида кўрсатиши керак.
Ўзбекистонликлар мамлакат Оила кодексида белгиланган қоидаларни қўллаб-қувватлайди. Кодексга мувофиқ турмуш қураётган ёшлар тиббий кўрикдан ўтиши ва ўз саломатлиги тўғрисида бир-бирини хабардор қилиши лозим.
«Дарё»нинг Telegram’даги расмий канали — @toshqindaryo’га аъзо бўлинг!
Изоҳ (0)