Тошкент шаҳар Яккасарой туманида ташкил этилган сайёр қабул давомида фуқаролар ва тадбиркорлик субъектлари ўзларини қийнаётган муаммолар юзасидан бевосита тегишли соҳа раҳбарларига мурожаат қилиш ва улар юзасидан жавоб олиш имкониятига эга бўлди. Бу ҳақда Facebook’даги Халқ билан мулоқот саҳифасида хабар берилди.
Давлат раҳбарининг топшириғига биноан ташкил этилган очиқ мулоқотда суд, ҳуқуқни муҳофаза қилиш ва назорат органлари, вазирликлар, давлат қўмиталари, марказий идора ва ташкилотлар, банк-молия муассасалари раҳбарлари, Тошкент шаҳри ва Яккасарой тумани ҳокимликларининг масъул ходимлари фуқаролар ва тадбиркорларнинг мурожаатларини тинглаб, уларни жойида ҳал этишга ҳаракат қилди. Қўшимча ўрганиш зарур, деб топилган мурожаатлар бўйича мутасадди идора ва ташкилотлар белгиланиб, ижроси назоратга олинди.
Таҳлилларга кўра, Ўзбекистон Республикаси Президентининг Виртуал қабулхонасига Тошкент шаҳрининг Яккасарой тумани аҳолисидан 2017 йилнинг 20 апрель ҳолатида жами 6654 та мурожаат келиб тушган.
Уларнинг асосий қисми уй-жой олиш ва уй-жой қуриш учун ер ажратиш, жойларда уй-жойларнинг таъмирга муҳтожлиги масаласи бўйича бўлиб, 1094 та мурожаат келиб тушган. Бундан ташқари, банк-молия ва солиққа тортиш масалалари бўйича 581 та, судларда жиноят ишлари, фуқаролик ишлари, хўжалик судларида ишлар кўрилиши бўйича 514 та, моддий ёрдам, иш ҳақи, пенсия таъминоти ҳамда болалар нафақасини олиш масалалари бўйича 385 та, фуқароликни қабул қилиш ва фуқароликдан чиқиш, паспорт олиш ва пропискага ўтиш масалалари бўйича 354 та, суд қарорларининг ижро этилиши масалалари бўйича 317 та, меҳнат ва бандлик масаласи, шу жумладан ишга жойлашиш ва ишга тикланиш масалалари бўйича 252 та мурожаат келиб тушган.
Мурожаатларнинг 2177 тасини бевосита Яккасарой тумани ҳокимлиги ваколатига тааллуқли масалалар ташкил этади. Туман ҳокимлигида мурожаатлар билан ишлаш тўғри ташкил этилмагани, мурожаатларни тақсимлаш ва назорат қилиш ишларига малакали кадрлар жалб этилмагани ҳамда таҳлил ишлари йўлга қўйилмагани оқибатида фуқароларнинг шикоят ва аризаларига қонунда белгиланган муддатда жавоб бериш шартлари бузилишига йўл қўйилган. Ҳозирги кунда 145 та муддати ўтган мурожаат мавжуд бўлиб, шундан 42 таси 2016 йилдан қолдиқ бўлиб ўтган, 103 таси эса жорий йилнинг январь, февраль ва март ойларида келиб келиб тушган.
«Дарё»нинг Telegram’даги расмий канали — @toshqindaryo’га аъзо бўлинг!
Изоҳ (0)