Ўзбекистон ва Тожикистон умумий суммаси 35 миллион доллар бўлган 20 та шартнома имзолади

Ўзбекистон ва Тожикистон компаниялари Душанбеда бўлиб ўтган бизнес-форум якунлари бўйича умумий суммаси 35 миллион доллардан ортиқ 20 та шартнома имзолади. Бу ҳақда UzDaily хабар бермоқда.

Жумладан, «Ўзкимёсаноат» Тожикистонга минерал ўғитлар етказиб бериш бўйича 5 та шартнома имзолади. Уларнинг умумий қиймати 28,4 миллион долларни ташкил этади.

«Ўзэлтехсаноат» ва «Неъматбахш» компанияси Тожикистонга қиймати 2,5 миллион долларга тенг электрмаиший товарлар етказиб берилиши бўйича меморандум имзолади.

«Ўзбекозиқовқатхолдинг» ва Тожикистоннинг «Иқтидор» компанияси ўртасида озиқ-овқат маҳсулотлари етказиб беришга қаратилган 2 миллион долларли шартнома тузилди.

«Ўзавтосаноат» АК «Лесинвест» ва «Тож Моторс» компаниялари билан енгил автомобиллар етказиб бериш бўйича келишувларга эришди. Уларнинг умумий қиймати 1,8 миллион доллардан иборат.

Шунингдек, Ўзбекистон корхоналари Тожикистонга тўртта шартнома доирасида 500 минг доллар эвазига қурилиш материаллари жўнатади.

«Дарё»нинг Telegram’даги расмий канали — @toshqindaryo’га аъзо бўлинг!