Тошкентдаги абитуриентлар учун ўқув марказларидан бирининг ётоқхонасида телефондан фойдаланиш қатъиян чекланган, кимдир телефонни яширинча ишлаца, қурилма ундан олиб қўйилади ва деворга мих билан қоқиб қўйилади. Бу ҳақда ўқув марказида таълим оладиган абитуриентлардан бирининг қариндоши Facebook’даги «Maslahat.uz» гуруҳида маълум қилди.
«Жияним … абитуриентлар ётоқхонасида туриб тайёрланмоқда, бугун жиянимни кўргани борсам, мана бу расмда кўрсатилган ҳолатга дуч келдим. Ётоқхонада телефон ишлатиш мумкин эмас, ҳар куни 18:30 дан 19:00 гача телефон ишлатиш мумкин, шунда ҳам ота-онага телефон қилиш учун, қолган пайт телефонни умуман ишлатиш мумкин эмас экан. Кимда-ким телефонни яширинча ишлатса, уни мана бундай қилиб михга қоқиб қўйишар экан. Жиянимдан сўрасам, ‘ҳа бу оддий ҳолат, ҳамма шунга кўникиб қолган’ деди», — дейилади постда.
«Сизлар нима деб ўйлайсизлар? Ўқитишнинг шунақа усули фойдалими? Ҳар ҳолда бунга ҳам ота-онанинг пули кетган», — дея фойдаланувчи гуруҳ аъзоларининг фикрлари билан қизиққан.
Постга изоҳ ёзганларнинг катта қисми бу усулни қўллаб-қувватлаган ва ёш болаларга қимматбаҳо телефон у ёқда турсин, телефоннинг ўзи ҳам керак эмаслиги, смартфонлар туфайли уларнинг хаёли аҳамиятсиз нарсаларга чалғиб, натижада улар ўқишга кира олмаслигини таъкидлаган.
Кўпчилик шундай ўқув маркази очилишини анчадан буён кутиб юрганини қайд этган ҳамда бу усулни мактабларда ва бошқа ўқув муассасаларида ҳам жорий қилиш таклифи билан чиққан. Шунингдек, баъзилар қизлар ва йигитларга турмуш қургунича мобил телефон бермасликни таклиф қилган.
Изоҳ ёзганларнинг баъзилари эса бу ҳолатга салбий муносабат билдирган. Кимдир бу ҳолатни бировнинг шахсий мулкини талон-тарож қилиш деб атаб, бу қонунга зид эканлигини таъкидлаган. Яна кимдир «мих билан қоқиб қўйиш» ўрнига бошқа усуллардан, масалан, жаримага тортиш йўлидан фойдаланишни таклиф қилган.
Муҳокамага шу ўқув марказининг раҳбарларидан бири ҳам қўшилиб, бундай чора кўрилишига абитуриентларнинг барчаси ўқиш бошланишидан олдин ўз розилигини берганини таъкидлаган. «Ҳозир болаларни телефондан чалғитиш жуда қийин бўляпти, охирида ҳеч ким ўз боласини айбдор қилмайди, ҳаммасига ўқитувчи айбдор бўлиб қолаверади, лекин билмайдики, бола бу ерда нималар билан машғул, ўқияптими ёки йўқми», — дея қўшиб қўйди у. Ўқув маркази вакили, шунингдек, пост муаллифидан «жиянининг телефонига ачинаётган бўлса, келиб уни олиб кетишини, телефон пулини эса улар тўлаб беришини» айтган.
Изоҳ (0)