Ўзбекистон бўйлаб «Оммавий китобхонлик ҳафталиги» ўтказилмоқда

Халқ таълими вазирлиги томонидан «Китоб орқали дунёни кашф этамиз» шиори остида «Оммавий китобхонлик ҳафталиги» ўтказилмоқда, деб хабар берди Ўзбекистон Халқ таълими вазирлиги матбуот хизмати.

Жорий йилдан бошлаб илк маротаба ташкил этилаётган мазкур ҳафталикдан мақсад ўқувчиларнинг билим олишга қизиқишларини шакллантириш, уларда мутолаа маданиятини тарбиялаш, китобхонликни ривожлантиришга инновацион ёндашувларни татбиқ этишдир.

Ҳафталик доирасида Ўзбекистондаги барча таълим муассасаларида илмий-амалий конференциялар, давра суҳбатлари, таниқли болалар шоири ва ёзувчилари билан ижодий учрашувлар, янги адабиётлар кўргазмалари, маҳорат сабоқлари, турли танловлар, викториналар, интеллектуал ўйинлар ташкил этилмоқда. Ушбу тадбирларга қарийб 2 миллионга яқин ўқувчи қамраб олинди.

Мазкур ҳафталик доирасида Ўзбекистон бўйлаб «Бир фарзандга – уч китоб» акцияси ташкил этилди.

Шунингдек, ҳафталик доирасида «Виртуал саёҳат: «Севимли китобим катта экранда», «Олам ҳақида бир олам китоб» мультимедиали тақдимотлар, «Вебландия» ўқувчилари учун энг яхши электрон ресурслар тақдимоти» виртуал кўргазмаси, «Энг яхши китобхон оила», «Энг яхши китобхон синф», «Энг китобхон мактаб» каби ижодий танловлар, «Эртаклардаги севимли персонажлар» мавзуларида викториналар, «Эртаклар карвони», «Китоблар оламига саёҳат» мавзуларида ифодали ўқиш танлови, «Болалар китобхонлиги сарҳадларини кенгайтириб» ва «Китоб варақлаганда...» мавзуларида ижодий учрашувлар, «Ўқиш — энг яхши машғулот» номли семинар-тренинг ва бошқа турли маданий-маърифий тадбирлар ўтказилмоқда.

«Дарё»нинг Telegram’даги расмий канали — @toshqindaryo’га аъзо бўлинг!