«Милан» хитойликлар қўлига ўтди ва Сильвио Берлускони 31 йилдан сўнг клуб билан хайрлашди
Берлускони «Милан»ни 31 йил давомида бошқарди. 2017 йилнинг 13 апрель куни эса Италиянинг шонли клубларидан бири расман хитойликлар қўлига ўтди. Эндиликда унга Rossoneri Sport Investment Lux компанияси инвесторлари эгалик қилади.
Фото: Google Images
Сильвио президентлик вақтида миланликлар жами 29 та соврин ютиб олишди. Шуларнинг 8 таси Италия чемпионлиги ва яна 5 таси Чемпионлар лигаси ғолиблиги эди.
«Милан»даги 30 йиллик раҳбарлигимдан сўнг клубни тарк этмоқдаман. Ичимдан нимадир узилди. Бироқ мен тушунаманки, замонавий футболда энди клубни фақатгина битта оила ушлаб тура олмайди. Рақобатбардош ва юқори даражали клуб учун янги сармоялар, ресурслар керак.
«Милан» менга ва умуман барчамизга совға қилган завқли онларни бир умр унутмайман. Бунда мен билан елкадош бўлган инсонларни умрбод ёдимда сақлаб қоламан.
Улкан ғалабаларни қўлга киритган мураббийларим ва футболчиларимни номма-ном санаш имкониятим йўқ. Уларнинг барчаси футбол тарихига ўз исмини ёзиб улгурган. Мен эса улар олдида чуқур таъзимдаман.
Оддий ишчиларга қадар миннатдорман. Улар Милан клубининг замонавий футболнинг ўрнак бўлишга арзийдиган юзи бўлишида катта меҳнат қилган. Улар орасида биринчи галда Адриано Галлианини тилга оламан. У жамоанинг юраги бўла олди, «Милан» қурилишида энг катта ишни бажарди.
Ҳаммадан ҳам кўпроқ мухлисларимизга раҳмат. Биз миллионлаб ишқибозларимнинг Forza, Милан деган ҳайқириқларини доим ҳис қила олдик. Уларсиз биз клубни тасаввур қила олмасдик, уларсиз юксакликка парвоз эта олмасдик. Айнан улар сабаб биз ютиш мумкин бўлган барча нарсани ютдик. Мен уларнинг садоқати акс этган камида мингта лаҳзани бир вақтнинг ўзида кўз олдимдан ўтказа оламан.
Шуни айтишни истардимки, мен бундан кейин ҳам «Милан»нинг асосий мухлиси бўлиб қолавераман. Отам менга унга бўлган муҳаббатни сингдирган болаликдан бошлаб, то у билан муваффақиятларга эришган вақтимда бўлгани каби, энди ҳам фақат унинг орзулари билан яшайман. Янги раҳбариятга эса биз эришганимиздан кўпроғига эришишларини тилаб қоламан.
Изоҳ (0)