Сталлоне фильм тушумларидан фоиз тўламагани учун Warner Bros. компаниясини судга берди

Голливуд актёри Сильвестр Сталлоне Warner Bros. Entertainment компаниясини судга бериб, уни «Вайрон қилувчи» (Demolition Man, 1993 йил) фильмининг касса тушумларидан унинг улушини тўламаганликда айблади, деб ёзади «ТАСС».

Лос-Анжелес судига берилган даъвода айтилишича, шартномага кўра, фильм тушумлари 125 миллион доллардан ошган тақдирда, унинг 15 фоизи актёрга берилиши керак. «Вайрон қилувчи» жангари фильми дунё прокатида 159 миллион доллар ишлаб олган.

Аммо Warner Bros. аввалроқ 57 миллион долларлик фильм ўз-ўзини қопламаганини айтган. Актёр вазиятга ойдинлик киритилишини талаб қилгач, киностудия ҳеч қандай изоҳларсиз Сталлонега 2,8 миллион доллар учун чек юборган.

Ўзига қонуний тарзда тегишли бўлган маблағдан ташқари, Сталлоне товон пулига ҳам умид қилмоқда.