Оқ уй расмий вакили Шон Спайсернинг маълум қилишича, у ўзининг Сурия президенти Башар Асадни Адольф Гитлерга қиёслаш бўйича ўхшамаган уриниши билан АҚШ президенти Дональд Трампга панд берди. Бу ҳақда Reuters хабар бермоқда.
«Мен хато қилдим. Буни бошқача талқин қилиб бўлмайди. Мен тегинмаса ҳам бўладиган мавзуни кўтариб, ҳаммасини расво қилдим», — деди АҚШ президентининг матбуот котиби.
Спайсернинг алоҳида қайд этишича, у ўзининг муваффақиятсиз чиққан баёноти билан АҚШ президенти Дональд Трампга панд берган.
«Президент сўнгги икки ҳафтани ақлбовар қилмас даражада ажойиб ўтказган эди, бироқ мен унга панд бериб қўйдим», — дея қўшимча қилди Шон Спайсер.
Аввалроқ Оқ уй расмий вакили Шон Спайсер Идлибда юз берган кимёвий ҳужум ҳақида фикр билдира туриб, Сурия президенти Башар Асадни нацистлар Германияси доҳийси Адольф Гитлер билан қиёслаган эди.
Трампнинг матбуот котиби брифинг вақтида «ҳатто Гитлер ҳам кимёвий қуролни қўллашдек пасткашликка қўл урмаган»ини айтган.
Брифингдан сўнг журналистларнинг: «Нацистлар Германияси газ камераларидан фойдаланганидан хабарингиз борми?», — қабилидаги саволига Оқ уй матбуот котиби бу ҳақда билишини, бироқ у Гитлер кимёвий ҳужумни шаҳарларга нисбатан қўлламаганини назарда тутганини айтиб ўтган.
Унинг бу сўзлари кейинчалик жамоатчилик томонидан кескин танқид остига олинди.
«Дарё»нинг Telegram’даги расмий канали — @toshqindaryo’га аъзо бўлинг!
Изоҳ (0)