Қуёшга яқин жойлашган митти сайёра Церера XIX аср бошида аниқланган. Йиллар давомида олиб борилган тадқиқотлар натижасида сайёрада доимий бўлмаган сийрак атмосфера борлиги маълум бўлган. Олимлар атмосферанинг беқарор ҳолатининг сабабини тушунтиришга муваффақ бўлди. Бу ҳақда National Geographic хабар берди.
Тадқиқотларни NASAнинг Dawn миссияси устида ишлаётган мутахассислари олиб борди. Dawn номли сайёралараро станция 2007 йилда Веста астероидини ва Церера сайёрасини тадқиқ қилиш учун йўлга чиққан. Церерадаги вақти-вақти билан пайдо бўладиган экзосфера анча аввал аниқланган ва бунинг сабаби митти сайёра ва Қуёш ўртасидаги масофа билан боғланган эди.
Herschel фазовий телескопи ва Ерда жойлашган Very Large Telescope обсерваторияси ёрдамида олиб борилган қўшимча кузатишлар Цереранинг атмосфераси Қуёшгача бўлган масофага эмас, қуёш циклларига боғлиқлигини кўрсатди. Тадқиқот якунларига бағишланган мақолада айтилишича, қуёш фаоллиги вақтида ундан чиқадиган оқим сайёра юзасини қоплаб турган музларга урилади. Натижада сув молекулалари ажралиб чиқади ва сайёра сатҳига кўтарилиб бир неча кун давомида сийрак атмосферани ҳосил қилади.
Ҳозирги вақтда қуёш фаоллиги ўзининг энг паст даражасида ва Церерада деярли атмосфера йўқ. Олимларнинг тахмин қилишича, бу ҳолат яна бир неча йил давом этади, кейин эса Церера экзосфераси қалинлаша бошлайди.
«Дарё»нинг Telegram’даги расмий канали — @toshqindaryo’га аъзо бўлинг!
Изоҳ (0)