Америкалик астронавт Роберт Шейн Кимброу очиқ коинотда метеоритлар ҳамда космик чиқиндилардан ҳимоя қилувчи қалқонни қўлидан чиқариб юборди, дея хабар бермоқда Meduza.
Ҳодиса 30 март куни, Тошкент вақти билан соат 19:00 да, Кимброу ҳамда Пегги Уицон Американинг тижорат кемаларига бириктирувчи тугунларни тайёрлаш билан шуғулланаётган пайтда рўй берган.
Ўлчами 162х59 сантиметр, оғирлиги 8 килограмм бўлган тахтланган қалқон Халқаро космик станция (ХКС)дан четга учиб кетган.
Кимброу ҳамда Уицон икки қалқондан биринчи қутини олган; ҳар бири биттадан қалқон олиб, шлюз томон ҳаракат қилган. Шундан сўнг қуйидагича мулоқот бўлиб ўтган:
Кимброу: — Пегги, менинг қалқоним йўқ.
Уицон: — Қани у?
Кимброу: — Билмайман.
Кимброу айнан қайси вақтда қалқонни йўқотгани видеога тушмаган, аммо қалқон бутунлай учиб кетгунига қадар шлюзнинг умумий планида, ўнг юқори қисмда кўринган.
Қолган учта қалқон ҳеч қандай қийинчиликсиз ўрнатилган. NASA вакили бўлиб ўтган воқеа бўйича суриштирув ишлари олиб борилаётганини маълум қилди.
Пегги Уицон — аёллар орасида очиқ коинотда энг кўп бўлган рекордчидир. У ХКСдан ташқарида умумий ҳисобда 53 соатдан кўпроқ ишлаган. Роберт Шейн Кимброу эса ҳозирда ХКС экипажи раҳбари. У очиқ коинотда 40 соатдан ортиқ вақт давомида бўлган.
«Дарё»нинг Telegram’даги расмий канали — @toshqindaryo’га аъзо бўлинг!
Изоҳ (0)