«Зарафшон» газетаси таҳририятига Отабек Эргашев мурожаат йўллаб, Пастдарғом туманининг Гўзалкент шаҳарчасидаги «Камолот уйи» муаммоларига эътибор қаратди.
Мурожаатда, жумладан, шундай дейилади:
«2015 йилда фойдаланишга топширилган ‘Камолот уйи’да 64 та ёш оила яшайди. Турли соҳаларда фаолият юритиб, юқори натижаларга эришган ёшларга бундай имконият яратилгандан барча қувонганди. Аммо ҳозир янги хонадонларга кўчиб ўтганларнинг муаммолари бир талай. Шу муаммолар юзасидан ёш оилалар ҳар икки-уч кунда пул йиғишга тушади.
– Ярим йилдирки, биз яшаётган кўп қаватли уйнинг оқова тўпланадиган махсус жойи 15-20 кунга бормасдан тўлиб-тошади, — дейди ‘Камолот уйи’да яшовчи Абдумурод Сафаров. —Шу ҳолат бўйича туман ҳокимлигига икки бор ёзма ва оғзаки мурожаат қилдик. Лекин натижа бўлмаяпти.
Уйда истиқомат қилаётганларнинг энг катта муаммоси — хонадонлардан чиқаётган оқова сувнинг кичик хандақда тез тўлиб қолаётгани. Ўтган вақт мобайнида оилалар бир неча марта пул йиғиб, махсус машина чақирди. Ҳар гал 10-15 машина чиқинди олинаётгани учун 700-800 минг сўмдан пул йиғиб бериляпти. Лекин бу билан хандақдаги чиқинди ҳажми камайгани йўқ.
— Ҳар куни ишдан қайтишим билан ‘Яна пул йиғяпмиз’, деб қўшнилар чиқишади, — дейди шу уйда яшовчи Ҳусан Суяров. — Чиқинди бетон қопқоқдан тоша бошлайди. Уй олдидаги бетон қоплама намликдан чўккан, ёмғир сувлари ертўлага оқади. Қўни-қўшни билан суҳбат мавзуси шу. Бу ерда яшаётганларнинг кўпчилиги ойлик иш ҳақларининг катта қисмини кредитга тўлайди. Яна бу ‘йиғ-йиғлар’.
Мазкур муаммо юзасидан ўтган йилнинг ноябрь ойидан буён бир неча бор мутасадди ташкилотларга мурожаат қилинди. Мурожаат юзасидан келган вакиллар эса қуруқ гапдан нарига ўтмаяпти. Наҳот бу масаланинг ечими бўлмаса?»
Газета ушбу мурожаатни Ўзбекистон Президентининг Пастдарғом туманидаги Халқ қабулхонаси эътиборига ҳавола қилди.
«Дарё»нинг Telegram’даги расмий канали — @toshqindaryo’га аъзо бўлинг!
Изоҳ (0)