Олий Мажлис Қонунчилик палатасига Сирдарё вилоятидан сайланган депутат Шерзод Қулматов Оқолтин ва Гулистон тумани фуқаролари билан юзма-юз мулоқот ўтказди. Бу ҳақда палата матбуот хизмати маълум қилди.
Оқолтин туман аҳолиси билан учрашувда 14-умумтаълим мактабининг спорт зали таъмирталаб аҳволда эканлигига эътибор қаратилди.
Гулистон туманидаги «Бешбулоқ» қишлоқ фуқаролар йиғинида 23 та хонадон вакиллари билан учрашув ўтказилди. Тумандаги қишлоқ врачлик пунктларининг бугунги моддий аҳволи, аҳоли учун яратилган шарт-шароитлар, дорихоналарда дори-дармонларнинг белгиланган нархларда сотилиши билан танишилди.
—Депутатга маҳалламиз ҳудудини ободонлаштириш, йўлларни асфальт қилиш, аҳолини тоза ичимлик суви билан таъминлаш борасидаги таклиф-мулоҳазалар билан мурожаат этдик, — дейди «Кўркам диёр» маҳалла фуқаролар йиғинида истиқомат қилувчи меҳнат фахрийси Бозоргул Мамасолиева. — Шунингдек, уйлар ёғингарчилик вақтида сув остида қолиб кетаётганидан ташвишимизни етказдик.
Фуқаролар Пахтаобод — Узоқов йўналишидаги йўлнинг 22,5 километр қисми таъмирталаб эканлиги, Пахтаобод — Гулистон йўналишининг 6-километридаги кўприк авария ҳолатига келиб қолганлиги сабабли трассада қатнов ёпилганлигини билдириб, депутатдан йўл ва кўприк таъмирида амалий ёрдам сўради.
«Дарё»нинг Telegram’даги расмий канали — @toshqindaryo’га аъзо бўлинг!
Изоҳ (0)