Amazon интернет-дўконига эгалик қилувчи шу номли компания раҳбари тадбиркор Жеффри Безос 29 март, чоршанба куни дунёнинг энг бой одамлари рейтингида иккинчи ўринга кўтарилди, деб ёзади «ТАСС». Бу ҳақда Bloomberg агентлигининг сўнгги ҳисоб-китоблари далолат бермоқда.
Бунгача ушбу рейтингнинг иккинчи поғонасини Berkshire Hathaway инвестиция холдинги хўжайини, америкалик таниқли молиячи Уоррен Баффет эгаллаб келар эди. Сўнгги фонд савдолари якунлари бўйича Безос Баффетни ортда қолдирди.
Безоснинг давлати энди 75,6 миллиард долларга баҳоланмоқда, ўтган сутка ичида у 1,49 миллиард долларга кўпайди. Чоршанба кунги савдо сессияси чоғида Amazon капитализацияси тахминан 9 миллиард долларга ўсди. Баффет активларининг жами қиймати 74,9 миллиарддан ошади, у 24 соат ичида 809 миллион долларга камайди.
Сайёранинг энг бадавлат одами эса кўп йиллардан буён Microsoft дастурий таъминотини ишлаб чиқувчи компания асосчиларидан бири Билл Гейтс ҳисобланади. Унинг ҳисобида, Bloomberg’нинг сўнгги маълумотларига кўра, жами 86 миллиард доллар бор.
Изоҳ (0)