Австралия полиция вазири ўз-ўзини полицияга тутиб берди

Австралия полиция вазири Трой Грант ўз устидан полицияга шикоят қилиб, унга машина бошқариш вақтида телефондан фойдаланганлик учун жарима ёзиб беришни сўради, деб ёзади «Мотор». Грант ҳаракатланмаётган машинанинг ҳайдовчи ўриндиғида ўтириб, смартфон орқали сурат олган.

Гап шундаки, вазир Twitter’га юкхонасида қўй олиб кетаётган бошқа автомобиль суратини жойлаган эди. Шундан сўнг унинг обуначилари Австралияда рулда ўтирган вақтда смартфондан фойдаланиш тақиқланганига эътибор қаратди.

Охир-оқибат Грант ўзи йўл қўйган қоидабузарлик ҳақида полицияга маълум қилди ва унга 325 Австралия доллари (тахминан 250 АҚШ доллари) миқдорида жарима ёзиб беришни сўради. Бундан ташқари, унинг ҳайдовчилик гувоҳномасига тўрт жарима балли қўшилиши мумкин.

Таъкидлаш жоиз, вазир суратни ҳаракатланмаётган автомобилда олган — у таъмирлаш ишлари туфайли юзага келган тирбандликда турган. Аммо Австралия қонунларига кўра, машина тураргоҳга тўхтатилган ва йўлнинг автомобиллар қатнайдиган қисмида бўлмаган вақтдагина рулда телефондан фойдаланиш мумкин.

https://twitter.com/troygrant/status/842980027322916868