Ўзбекистон Ахборот технологиялари ва коммуникацияларини ривожлантириш вазирлиги мамлакат Президентининг виртуал қабулхонасига мурожаатлар пуллик бўлгани ҳақидаги миш-мишларни рад этди. Вазирликнинг бу ҳақдаги тегишли баёноти ташкилотнинг Facebook’даги саҳифасида эълон қилинган. Вазирлик баёнотининг тўлиқ матни билан қуйида танишиш мумкин.
2016 йилнинг 25 сентябрида ишга туширилган Ўзбекистон Президентининг Виртуал қабулхонаси ҳукуматнинг аҳоли ва тадбиркорлик субъектларининг мурожаатлари билан яқиндан ишлашга, жойларда мавжуд муаммоларни ҳал қилиш ва коррупциянинг олдини олишга мўлжалланган бепул электрон ресурс бўлиб келган ва бундан кейин ҳам бепул бўлиб қолади.«Дарё»нинг Telegram’даги расмий канали — @toshqindaryo’га аъзо бўлинг!Халқ орасида «Ер шари миш-мишлар билан тўладир», деган гап бор. Жумладан, сўнгги вақтларда PM.gov.uz порталининг пуллик бўлгани, аҳоли вакилларидан қабул қилинадиган мурожаатлар учун пул олиниши ҳақидаги миш-мишлар болалаб кетган эди. Бу тўғридаги миш-мишлар одамлар ўртасида ижтимоий тармоқ ва мессенжерлар орқали тарқалмоқда. Хусусан, гўёки кимлардир аҳоли ўртасида гувоҳномасини кўрсатган ҳолда, ўзини порталнинг ходими сифатида таништирган ва аҳолидан мурожаатлари учун пул талаб қилган.
Ўзбекистон Ахборот технологиялари ва коммуникацияларини ривожлантириш вазирлиги бу каби маълумотларни рад қилади ва бу гап-сўзларнинг батамом асоссизлигидан аҳолини огоҳлантиради.
2017 йилнинг «Халқ билан мулоқот ва инсон манфаатлари йили» деб эълон қилинишининг ўзиёқ порталнинг аҳоли ва ҳукумат ўртасидаги беминнат кўприк эканлигини англатади. Шунингдек, ҳукумат раҳбарияти мазкур йўналишни ривожлантириш ва аҳоли билан мулоқотда янги ва қулай усулларни ўрнатадиган лойиҳаларни молиялаштириш юзасидан вазифаларни амалга оширмоқда.
Шунингдек, Миллий оператор томонидан абонентлари учун қатор ҳукумат ва давлат сайтларидан, жумладан Ўзбекистон Президентининг Виртуал қабулхонаси — PM.gov.uz’дан бепул интернет трафиги асосида фойдаланиш имкони яратилди.
Ўзбекистон Ахборот технологиялари ва коммуникацияларини ривожлантириш вазирлиги аҳолини бу каби миш-мишларга ишонмасликка чақиради, Виртуал қабулхонанинг мурожаатчи учун бундан кейин ҳам бепул хизмат кўрсатишини маълум қилади. Бу тўғрида батафсил жойлардаги «Халқ қабулхонаси»га мурожаат қилиш мақсадга мувофиқ.
Изоҳ (0)