Канаданинг Ванкувер шаҳрида анъанавий Pwn2Own 2017 хакерлар мусобақасида ахборот хавфсизлиги соҳасидаги тадқиқотчилар жамоаси юзлаб томошабинлар кўз ўнгида Microsoft Windows ва Apple MacОS операцион тизимларига бузиб кирди, деб ёзади TechWorm.
Синовларнинг биринчи кунида Qihoo360 жамоаси ядродаги камчилик орқали МаcОS’га бузиб кириб, махфий ахборотни қўлга киритди. Бунинг учун мутахассисларга бир миллион долларлик жами мукофот жамғармасидан 10 минг доллар берилди. Худди шунча маблағ МаcОS’га бошқа заифлик ёрдамида бузиб кира олган Chaitin Security Lab жамоасига топширилди.
Windows операцион тизимига 360 Security ва Team Sniper жамоалари мутахассислари бузиб кира олди. Жамоаларнинг ҳар бири 15 минг доллардан ишлаб олди.
55 минг долларлик мукофот эвазига Team Sniper ва Sword Team тадқиқотчилари Microsoft Edge браузерига бузиб кирди, Chaitin Security жамоаси эса Mozilla Firefox’даги заифликни топди. 360 Security Safari’га бузиб киргани учун 35 минг доллар билан мукофотланди.
Изоҳ (0)