Ким Чон Намнинг оиласи жасадни Малайзиядан олиб кетиш истагини билдирмади

Куала-Лумпур аэропортида ўлдирилган Ким Чон Намнинг яқинлари жасадни олиб кетиш истагини билдирмади ва Малайзия расмийларига бу масалани ҳал этиш ҳуқуқини берди. Бу ҳақда мамлакат полицияси раҳбарининг ўринбосари Нур Рашид Иброҳим маълум қилди, дея хабар беради «ТАСС». 

«Қариндошлар Малайзия ҳукумати жасадни нима қилиш масаласини ҳал этишига розилик берди», — дея таъкидлади Нур Рашид Иброҳим.

Kyodo агентлигига кўра, Малайзия расмийлари 13 мартдан бери Шимолий Корея билан мамлакатдан фуқароларини чиқариб олиш борасида музокаралар олиб бормоқда.

Уларга Ким Чон Намнинг жасади КХДРга берилиши эвазига Малайзияга қайтишига рухсат берилиши мумкинлиги истисно этилмади. 

Эслатиб ўтамиз, олдинроқ Малайзия расмийлари Ким Чон Нам жасадини олиб кетиш учун унинг оиласига 3 ҳафта муддат берганди.

«Дарё»нинг Telegram’даги расмий канали — @toshqindaryo’га аъзо бўлинг!