2016 йилнинг декабрида Сочи яқинида Қора денгизда ҳалокатга учраган Ту-154 ҳарбий самолёти «экипаж командири бошқаруви остида назорат қилинаётган парвоз чоғида» сувга қўнган. Бу ҳақда «Коммерсантъ» хабар бермоқда.
Ту-154 ҳалокати текширувининг техник қисми якунлангач, мутахассислар у қулаб тушмагани, балки экипаж командири Роман Волков бошқаруви остидаги назорат қилинаётган парвоз чоғида сувга қўнгани ҳақидаги хулосага келди.
Учувчининг бундай ғалати хатти-ҳаракати сабаби ҳозир текширилмоқда. Россия мудофаа вазирлиги марҳум учувчининг тиббий картасини, психологик тестлари натижаларини ўрганмоқда, майорга учишни ўргатган инструкторларни сўроқ қилмоқда, шунингдек, экипажнинг рейсдан олдинги ҳордиғи тўғри ташкил қилинганлигини аниқлаштирмоқда.
Нашр ҳарбий-техник комиссияга яқин манбасига таяниб маълум қилишича, 3D-моделлаштириш самолёт мутлақо одатий режимда учиб кетганини кўрсатган. Ердан кўтарилганидан сўнг тахминан бир дақиқа ўтиб, самолёт 250 метр баландликка кўтарилган, тезлиги эса соатига 360—370 километрга етган, шундан сўнг бортда «штатдан ташқари вазият шиддат билан юзага кела бошлаган».
«Вазият шундан иборат эдики, Роман Волков баландликни янада ошириш ўрнига, машинани қўниш режимига ўтказиб қўйган», — дейилади хабарда.
Газета экспертлари фикрича, бундай ҳаракатларга учувчининг макондаги дезориентацияси ёки бўлмаса, унинг ҳиссий танглик аҳволида эканлиги сабаб бўлган бўлиши мумкин.
Эслатиб ўтамиз, 2016 йил 25 декабрь куни Сочи шаҳридан кўтарилган Ту-154 самолёти ҳавога кўтарилганидан 70 сония ўтиб Қора денгизга қулаган эди. Авиаҳалокат оқибатида самолёт бортида бўлган 92 кишининг барчаси ҳалок бўлган.
Йўловчиларнинг аксарияти Россия армиясининг Александров номидаги ашула ва рақс ансамбли аъзолари эди. Улар россиялик ҳарбийларга Янги йил концерти тақдим этиш учун Сурияга учиб кетаётган эди.
Изоҳ (0)