Тошкентнинг «Бунёдкор» футбол клуби Осиё Чемпионлар лигаси гуруҳ босқичининг 3-турида ҳам мағлубият аламини тотиб кўрди. Бунга қадар Сергей Лушчан жамоаси Саудияда «Ал-Аҳли»дан, Тошкентда «Ал-Айн»дан енгилганди.
Эроннинг «Зоб Оҳан» клубини қабул қилган «қалдирғочлар» 54-дақиқада гол ўтказиб юборди. Ҳимоячи Жавлон Мирабдуллаев тўпни қайтаришда хатога йўл қўйди, форслар таркибида тўп сураётган Бенгстон эса буни кечирмади.
«Championat.asia» нашри маълумотига кўра, Жавлон Мирабдуллаев бунгача 398 кун давомида катта футболда кўриниш бермаган. У сўнгги бор 2016 йилнинг февраль ойида БААнинг «Аш-Шабоб» клубига қарши плей-офф ўйинида ўйнаган бўлиб, шундан кейин соғлиғи билан боғлиқ муаммолар сабаб «йўқолиб қолганди».
92-дақиқада Алишер Саноев ўз жарима майдончаси ичида рақибини қўполлик билан тўхтатди. Белгиланган пенальтини Муртазо Табризий аниқ амалга ошириб, якуний натижани ўрнатди.
«Зоб Оҳан»га қарши беллашувнинг 63-дақиқасида «Бунёдкор»нинг молдовалик легионери Вадим Чемиртан қизил карточка олиб, майдонни шерикларидан эртароқ тарк этди. Қайд этиш керак, бир тур аввал Акром Комилов шундай ишга қўл уриб, «Бунёдкор»ни қийин аҳволда қолдирганди.
Мазкур беллашувда, шунингдек, Ўзбекистон миллий терма жамоаси аъзоси Элдор Шомуродов иштирок этмади. «Олмалиқ» клубига қарши ўйинда ҳам у захирадан майдонга тушган бўлиб, Сергей Лушчан буни терма жамоа мураббийларининг маслаҳати билан изоҳлаганди.
3-турдан кейин «Бунёдкор» гуруҳда 0 очко билан сўнгги ўринни эгаллаб турибди. Бу билан клуб навбатдаги босқичга чиқиш имкониятини деярли йўқотди ва имкониятларини кескин камайтирди. Қайд этиш керак, клуб ташкил топганидан буён халқаро майдонда кетма-кет уч ўйинни бой бермаганди. Сергей Лушчан бошқарувида «қалдирғочлар» мана шундай антирекорд ўрнатди.
Маълумот учун, Лушчан тарихда илк бор «Бунёдкор»ни гуруҳ босқичидан олиб чиқа олмаган мураббий ҳисобланади. У бу ишни бир эмас, икки бор — 2015 ва 2016 йилги мавсумларда такрорлаган. Айни вақтда учинчи муваффақиятсизликка анча яқин турибди.
Осиё Чемпионлар лигаси «С» гуруҳи. 3-тур 13 март, душанба
«Бунёдкор» (Ўзбекистон) — «Зоб Оҳан» (Эрон) 0:2
Гол: Бенгтсон, 54 (0:1). Муртазо Табризий, 90+3-пен (0:2).Четлатиш: Вадим Чемиртан, 63 (Б).«Бунёдкор»: Мурод Зухуров — Хуршид Ғиёсов, Душан Мичич, Рустам Ашурматов, Жавлон Мирабдуллаев, Нурилло Тўхтасинов (Алишер Саноев, 70), Жавлон Иброҳимов, Отабек Шукуров (Жавоҳир Эсонқулов, 52), Достон Ҳамдамов, Шаҳзод Нурматов (Сардор Азимов, 75), Вадим Чемиртан.
Изоҳ (0)