Дунёнинг энг оғир аёли операциядан сўнг арабча рақс тушди (видео)

Дунёдаги энг оғир аёл Имон Аҳмад Абдулати ошқозонни кичрайтириш операциясидан сўнг бир неча рақс ҳаракатини амалга оширишга муваффақ бўлди. Бу ҳақда «РИА Новости» хабар бермоқда.

Мумбай касалхонасида олинган видеолавҳада 36 ёшли мисрлик аёл арабча мусиқага мос бир неча рақс ҳаракатини амалга оширганини кўриш мумкин. Операцияга қадар у ҳатто қўлини ҳам кўтара олмаган.

Тиббий муассаса ходимларининг қайд этишича, аёлнинг вазни секин-секин камаймоқда ва ҳозирда 400 килограммдан камроққа тенг. Имон илк бор касалхонага келтирилганида қарийб ярим тонна вазнга эга бўлган.

Ҳозирча мисрлик аёл суюқ таом истеъмол қилиб, операциядан сўнг зарур бўлган барча муолажалардан ўтмоқда.

Ҳолати яхшилангач, Имон Искандариядаги уйига қайтиб, шифокорлар кўригида озишни давом эттиради.

Имон Аҳмад Абдулати йириклашув касаллиги ҳамда темир етишмовчилиги билан оғриган. Бундан ташқари, у бош мияга қон қуйилиши (инсульт)га учраб, 25 ёшида ётоққа михланиб қолган.

Имонга мумбайлик шифокор Муффазал Лаквадала ёрдам беришга тайёрлигини маълум қилгач, февраль ойида мисрлик аёл самолётда Мумбайга келтирилди. 7 март куни ошқозонни аввалги ҳажмига нисбатан 15 фоизга қисқартириш бўйича операция ўтказилиб, ёғнинг маълум қисми олиб ташланди. «Дарё»нинг Telegram’даги расмий канали — @toshqindaryo’га аъзо бўлинг!