Бельгиядаги хусусий ҳайвонот боғида каркидонларни браконьерлардан сақлаш учун уларнинг шохларини кесиб ташлашга қарор қилинди. Бу ҳақда TJournal хабар бермоқда.
Март ойи бошида браконьерлар Франциядаги ҳайвонот боғида оқ каркидонни ўлдирди. Жиноятчилар орқа эшикдан кирадиган тўсиқни бузиб, каркидонлар хонасига кирди. Бу вақтда хона ичида учта каркидон бўлган.
Браконьерлар кимдир уларни чўчитгани учун ёки вақт етмагани сабабли хона ичидаги барча жонзотларни ўлдиришга улгурмади. Бу Европада қайд этилган биринчи ҳолат сифатида қайд этилганди. Энди Бельгияда шунга ўхшаш ҳолатларнинг олдини олиш учун чоралар кўрилмоқда.
Каркидон шохидан тайёрланган кукун баъзи мамлакатларда шифобахш дори саналади. Мана шундай кукуннинг 1 килограми 75 минг долларгача баҳоланиши мумкин.
Африкада браконьерлардан сақлаш учун каркидонларнинг шохлари кесиб ташланади. Зоологларнинг айтишича, шохнинг кесиб ташланиши жонзотга оғриқ келтирмайди ва маълум муддатдан кейин у яна ўсиб чиқади.Баъзи мамлакатларда браконьерларга қарши қаттиққўл чоралар кўрилади. Масалан, Ҳиндистонда каркидон овчиларининг ўзи отиб ташланади.
Браконьерлар туфайли каркидонларнинг баъзи турлари йўқолиб кетиш хавфи остида турибди. Ҳозирги кунда дунёда учтагина шимол оқ каркидони – иккита урғочи ва битта эркак қолган. Агар улар насл қолдира олмаса, ушбу турдаги каркидонлар бутунлай йўқолиб кетади. Бугунги кунда ушбу каркидонлар сутка давомида қуролланган махсус хизмат ходимлари томонидан назорат остида бўлиб турибди.«Дарё»нинг Telegram’даги расмий канали — @toshqindaryo’га аъзо бўлинг!
Изоҳ (0)