Тошкент шаҳридаги «Зарафшон» концерт залида 2017 йил 1 март, чоршанба куни, «Тараққиёт стратегияси» Марказининг тақдимоти бўлиб ўтди. Марказ давлат раҳбари Шавкат Мирзиёев ташаббуси билан ишлаб чиқилган 2017—2021 йилларда Ўзбекистон Республикасини ривожлантиришнинг 5 та устувор йўналиши бўйича Ҳаракатлар стратегияси ҳамда «Халқ билан мулоқот ва инсон манфаатлари йили» Давлат дастурини амалга ошириш мақсадида ташкил этилди.
Нодавлат нотижорат ташкилоти сифатида ташкил этилган Марказ 2017 йил 23 февралда Адлия вазирлигида рўйхатдан ўтказилди. Марказнинг асосий мақсади Ҳаракатлар стратегиясини амалга ошириш бўйича йиллик чора-тадбирларни ишлаб чиқишга кўмаклашиш ва Ҳаракатлар стратегиясини амалга ошириш бўйича комиссияларни ахборот-таҳлилий материаллар билан таъминлашдан иборат.
Марказ ва Ўзбекистон электрон оммавий ахборот воситалари миллий ассоциацияси ўртасида Ҳаракатлар стратегиясини амалга ошириш бўйича жамоатчилик муҳокамаларини ўтказиш ва ёритиш мақсадида битим имзоланган. Тақдимот доирасида ҳамкорлик ишларини амалга ошириш учун «Зарафшон» концерт зали базасида ташкил этилган «MEDIA HALL NAESMI»медиа майдоннинг очилиши бўлиб ўтди.
Маълумот учун: нодавлат нотижорат ташкилоти мақомига эга бўлган «Тараққиёт стратегияси» Маркази Фуқаролик жамияти шаклланишини мониторинг қилиш мустақил институти, Ўзбекистон Республикаси Президенти ҳузуридаги Амалдаги қонун ҳужжатларини мониторинг қилиш институти, Савдо-саноат палатаси, Ўзбекистон Адвокатлар палатаси, Ўзбекистон Республикаси Президенти ҳузуридаги Давлат бошқаруви академияси, Электрон оммавий ахборот воситалари миллий ассоциацияси, Ўзбекистон нодавлат нотижорат ташкилотлари миллий ассоциацияси муассислигида ташкил этилди.
«Дарё»нинг Telegram’даги расмий канали — @toshqindaryo’га аъзо бўлинг!
Изоҳ (0)