Осиё Чемпионлар лигасининг 2017 йилги мавсумини Саудия Арабистонида «Ал-Аҳли»дан мағлуб бўлиш билан бошлаган Тошкентнинг «Бунёдкор» клуби 2-турда ҳам шу юришини давом эттирди. Ўз майдонида турнирнинг амалдаги финалчиси ҳисобланган «Ал-Айн»ни қабул қилган Сергей Лушчан шогирдлари 2:3 ҳисобида енгилди.
Ҳисоб қитъанинг юлдуз футболчиси Умар Абдулраҳмон томонидан очилган бўлса, кейинроқ «Бунёдкор»нинг янги аъзоси Вадим Чемиртан мувозанатни тиклади. Беш дақиқадан кейин Кайо Мурод Зухуров дарвозасига иккинчи бор йўл топди. Тайм якунига тўрт дақиқа қолганида эса Достон Ҳамдамов ҳисобнинг иккинчи бор тенглашиши учун сабабчи бўлди.
Иккинчи бўлимда мухлислар яна 1 та гол кўрди. 88-дақиқада учрашувни бошқариб борган австралиялик ҳакам Жаррет Жиллетт мезбонлар дарвозаси томон пенальти белгилади ва уни Умар Абдулраҳмон аниқ амалга ошириб, жамоасининг ғалабасини таъминлади. Шунингдек, 71-дақиқада «Бунёдкор» ҳимоячиси Акром Комилов қизил карточка олиб, майдонни тарк этди ҳамда «Зоб Аҳон»га қарши навбатдаги турда майдонга тушиш имкониятини йўққа чиқарди. Қайд этиш керак, «Ал-Айн» илк турда форс клубини ўз уйида қабул қилиб, 1:1 ҳисобида дуранг ўйнаганди.
Маълумот учун, «Ал-Айн» Чемпионлар лигасининг ўтган мавсумида «Локомотив» билан тўқнаш келиб, ўшанда ҳам Тошкентдан ғалаба билан қайтган ва «темирйўлчилар»ни чорак финалда қолдириб кетганди. Ўша учрашувда ягона голга «Бунёдкор»га ҳам гол урган Кайо муаллифлик қилганди.
«Бунёдкор» Сергей Лушчан бошқарувида кетма-кет икки йил гуруҳдан чиқа олмаганди. Чемпионлар лигасининг сўнгги тўрт ўйинида рақиб дарвозасига гол ҳам ура олмаганди. «Ал-Айн» билан ўйинда эса 400 дақиқадан ортиқроқ давом этган голсиз серияга якун ясалди. Бироқ бу голлар «Бунёдкор»ни сўнгги ўриндан тепага кўтариб қўймади.
Осиё Чемпионлар лигаси «C» гуруҳи. 2-тур 28 февраль, сешанба
«Бунёдкор» (Ўзбекистон) — «Ал-Айн» (БАА) 2:3
Голлар: Умар Абдулраҳмон, 7 (0:1). Вадим Чемиртан, 9 (1:1). Кайо, 14 (1:2). Достон Ҳамдамов, 41 (2:2). Умар Абдулраҳмон, 89-пен (2:3).Четлатиш: Акром Комилов, 71 (Б).
«Бунёдкор»: Мурод Зухуров — Дилшодбек Аҳмадалиев, Рустам Ашурматов, Душан Мичич, Акром Комилов, Жавлон Иброҳимов, Алишер Саноев (Отабек Шукуров, 55), Элдор Шомуродов, Нурилло Тўхтасинов (Хуршид Ғиёсов, 74), Достон Ҳамдамов, Вадим Чемиртан.
Изоҳ (0)