Бўлиб ўтган Мода ҳафталиклари бизга турли трендларни ҳадя этди, шунингдек, бизга одатий бўлиб қолган кийим-кечакларнинг қай бири ҳамон долзарб эканлиги ва қай бири ўз аҳамиятини йўқотганлигини билдирди. Аммо мода чўққисида бўлган тенденцияларнинг барчаси ҳам ўзбекистонлик олифталар орасида оммалашмаётгани эътиборга чалинади. Наҳотки трендлар бизга кечикиб етиб келмоқда? Ёки гап бошқа нарсадами?
Кюлот шимлар
Кюлот — тепасидан пастигача кенг тикилган калта шим.Ўзбекистонлик қизлар бундай шимни четлаб ўтиб, торайтирилган вариантларни афзал кўрмоқда. Сабаби нимада? Эҳтимол, улар кенг шим тананинг пастки қисмини катта қилиб кўрсатиши ҳақидаги янглиш тушунчага эгадир? Аммо, бир томондан, калта шим тўпиқ суягига урғу бериши, тананинг бу қисми ҳаммада ҳам нозик кўринишга эга эмаслигини ҳисобга олганда, улар бундай тренддан воз кечиб тўғри қилади.
Oversize кийимлар
Oversize — аёлларга хос нозикликни бўрттириб кўрсатиш учун атайлаб кийиладиган бир неча ўлчамга катта кийимлар.Аммо бизда oversize буюмларни фақат ўсмир ва ёш қизлар киймоқда. Эҳтимол, кўпчиликнинг бу трендни қабул қилмаслиги сабаби oversize кардиган ёки пальтолар ўлчами нотўғри танланган кийимлар сифатида тасаввур уйғотишидир.
Спорт шими + пошнали туфли
Спорт шимини башанг туфли билан бирга кийиш аллақачон кўча модасининг асосий хусусиятларидан бирига айланиб улгурган.Аммо Собиқ иттифоқ мамлакатларининг барчасида бундай кийим 90 йиллар бошидан буён дидсизликнинг чўққиси деб ҳисоблаб келинади.
Сунъий мўйна
Классик қора рангдан тортиб ёрқин сариқ ранггача бўлган синтетик мўйналарни қишки Мода ҳафталикларининг деярли барча тўпламларида учратиш мумкин. Аммо бизнинг мамлакатда сунъий мўйнадан тикилган палто ва шубаларни кийишга шошилишмаяпти. Нега?Биринчидан, ҳақиқий бўлмаган мўйна бизда камбағаллик синоними ҳисобланади (у ҳатто ҳақиқийсидан ҳам қимматбаҳороқ бўлса-да). Иккинчидан, бундай шубаларга бизнинг иқлимда эҳтиёж ҳам йўқ — энг қаҳратон кунларда ҳам оддий пар куртка (пуховик) етарли бўлади.
Изоҳ (0)