Куйган товани оддий усул билан – чўтка ва идиш ювиш воситаси ёрдамида тозалаб бўлмайди. Бунинг учун бошқа мураккаб воситаларни ишга солишга тўғри келади.
Биринчи усул уйдаги туз, сода ва сиркага мўлжалланган. Бунинг учун това ичига 50—70 г туз сепамиз, 100 г сирка қуямиз. Товани оловга қўйиб, аралашма қайнаш ҳолига келгандан сўнг 2 чой қошиқ сода соламиз ва паст оловда қайнатамиз. Товани оловдан оламиз ва совигандан кейин қаттиқ бўлмаган ювгич билан ювиб ташлаймиз.
Зангламайдиган металлдан қилинган товани лимон кислотаси эритмаси ёрдамида тозалаш мумкин. Эритма 10 г кислота ва 300 мл сувдан тайёрланади. Эритмани товага солиб 15 дақиқа қайнатилади ва оқиб турган сувда ювиб ташланади. Тованинг ташқи томонини сода билан тозалаймиз.
Алюминийдан қилинган товани тозалаш бироз қийинроқ. Аччиқ ва ишқорли эритмалар ишлатиб бўлмайди, чунки улар това юзасига зарар етказиши мумкин. Бундай идишлар оддий сода ёрдамида тозаланади.
Керамик това юзасини тирнаб юбормаслик учун уни кремсифат идиш ювиш воситалари ёрдамида тозалаймиз. Шунингдек, тиш пастасини ҳам синаб кўриш мумкин.
Тефлон товалардан куйган ёғларни кетказиш жуда осон. Унга оддий сув ёки совун эритмасини солиб, 20 дақиқа ўртача оловда қайнатиш кифоя қилади.
Изоҳ (0)