«Ўзбекистон темир йўллари» акционерлик жамияти ва «Қозоғистон темир йўллари» акционерлик жамияти Қозоғистон Республикаси ҳудудига олиб кириладиган юклар ҳақидаги маълумотларни электрон алмашиш ҳақида келишув имзолади. Ҳужжат 22 февралда Тошкентда Ўзбекистон Республикаси ва Қозоғистон Республикаси ўртасидаги икки ёқлама ҳамкорлик бўйича Ҳукуматлараро комиссиянинг 16-йиғилиши доирасида имзоланди. Бу ҳақда UzDaily хабар берди.
Музокаралар давомида икки мамлакат темир йўл компаниялари вакиллари соҳадаги ҳамкорликнинг истиқболдаги ривожи масалаларини муҳокама қилди.
2016 йилда Ўзбекистон ва Қозоғистон ўртасидаги темир йўл транспортида юк ташувлар бўйича ижобий натижа қайд этилди. Юк ташувлар ҳажми 19 миллион тоннани ташкил қилди.
Қозоғистон томонидан экспорт қилинадиган дон ва ун маҳсулотлари, 45 футли совутгичли контейнерларда ташиладиган юклар, Қозоғистон ҳудуди орқали олиб ўтиладиган Ўзбекистоннинг мева-сабзавот ва бошқа қишлоқ хўжалиги маҳсулотлари транзити тарифларига чегирмалар жорий этиш бўйича келишувга эришилди.
«Дарё»нинг Telegram’даги расмий канали — @toshqindaryo’га аъзо бўлинг!
Изоҳ (0)