АҚШ президенти Дональд Трамп NBC News телеканалига берган интервьюсида АҚШдаги антисемитизм кайфиятини қоралади ва мамлакат бўйлаб яҳудий жамоат марказларига бўлаётган таҳдидлар тўлқинини тўхтатишга чақирди. Бу ҳақда «Газета.ru» хабар бермоқда.
«Мен буларнинг бари жуда ёмон, жуда даҳшатли ҳолат, деб ҳисоблайман. Бу антисемитизм бўладими ёки ирқчилик — бизни иккига бўлиш билан боғлиқ ҳар қандай жараён — бари жуда даҳшатли», — деди АҚШ президенти.
У яҳудий жамоат марказларига бўлаётган ҳужумлар тўлқини қаердан келаётгани ҳақида ҳозирча маълумот йўқлигини маълум қилди ва айбдорлар қўлга олинишига умид билдирди.
«Антисемитизм — бу жирканч ҳодиса, у тўхтатилиши лозим ва тўхтатилади ҳам», — дея қўшимча қилди Трамп.
NBC News телеканали маълумотларига кўра, сўнгги бир неча куни ичида бир қатор яҳудий жамоат марказларига уларнинг биносида бомба борлиги ҳақидаги таҳдидли хабарлар юборилган. Бироқ ҳеч бир ҳолатда бу хабарлар тасдиқланмаган.
«Дарё»нинг Telegram’даги расмий канали — @toshqindaryo’га аъзо бўлинг!