Академик Маҳмуд Мирзаев номидаги Боғдорчилик, узумчилик ва виночилик илмий-тадқиқот институти (собиқ Шредер номидаги ИТИ) ҳудудида дарахтларнинг шафқатсизларча кесилгани тўғрисидаги маълумотлар ўз тасдиғини топди, дея хабар бермоқда «Газета.uz».
Институтнинг бир гуруҳ фахрийлари дарахтларнинг оммавий равишда кесилгани, уларнинг аксарияти қарийб бир асрлик экани бўйича давлат органлари ва ОАВга мурожаат билан чиқди. Табиатни муҳофаза қилиш инспекторларининг текшируви мазкур маълумотларнинг тўғри эканини тасдиқлади.
«Газета.uz» ушбу масалада изоҳ беришини сўраб институт ва Ўзбекистон Табиатни муҳофаза қилиш давлат қўмитасига мурожаат қилган. Вазиятга институт бош директори ўринбосари Жамолиддин Файзиев ойдинлик киритди. Унинг сўзларига кўра, институт ҳудудида ҳақиқатан ҳам 39 та қуриган ва касалланган дарахт кесилган. Унинг қайд этишича, институтда бу дарахтларни кесиш учун рухсат берувчи ҳужжатлар ҳам мавжуд.
Табиатни муҳофаза қилиш давлат қўмитасидан эса бошқачароқ маълумотларни тақдим этилди. Маҳкаманинг расмий хабарида айтилишича, табиатни муҳофаза қилиш инспекторлари академик Маҳмуд Мирзаев номидаги Боғдорчилик, узумчилик ва виночилик ИТИ ҳудудида дарахтларнинг ноқонуний кесилишига ойдинлик киритиш бўйича ҳодиса жойида вазиятни ҳар томонлама ўрганган. Натижада бир қатор қонун бузилиши ҳолатлари аниқланган.
Кесилган дарахтлар схемаси ўрганилганда, кесишга рухсат берилган 69 та дарахтнинг фақатгина 58 таси кесилган маълум бўлди. Бироқ қолган ҳудудлар текширилганда, мазкур 58 та дарахтдан ташқари рухсатсиз яна 52 та дарахт кесилгани аниқланди. Дарахтлардан қолган тўнкалар орқали уларнинг 22 таси қуригани, 30 таси эса тўла соғлом дарахтлар экани маълум бўлди.
«Қонун бузилиши тўғрисидаги материаллар Тошкент вилоят прокуратурасига тақдим этилди ва улар бўйича текширув тергов ишлари олиб борилмоқда», — дейилади «Газета.uz» ахборотида.
«Дарё»нинг Telegram’даги расмий канали — @toshqindaryo’га аъзо бўлинг!
Изоҳ (0)