Сент-Луис чеккасидаги яҳудий қабристонида 19 февраль куни бир гуруҳ одамлар 200 дан ортиқ қабрга зарар етказди. Кўплаб қабртошлар бурдалаб ташланган, бироқ ёдгорликларга ҳеч қандай граффитилар чизилмаган.
Ҳуқуқбузарлар нима учун бундай қилгани номаълум. Полиция вакилларининг фикрича, бу антисемитизм билан боғлиқ жиноят эмас.
Миссури штати губернатори Эрик Грейтенс юз берган ҳодисани «манфур ва қўрқоқ қилмиш» деб атаган. У барча хоҳловчиларни 22 февраль куни қабристонга келиб, уни тозалашда ёрдам кўрсатишга чақирди. Грейтенс ўзи ҳам қабристонда бўлишга ваъда берди.
АҚШ президенти Дональд Трамп қабристоннинг таҳқирланишини «даҳшатли ҳаракат» деб атади ва антисемитизмнинг ҳар қандай кўринишини қоралади, деб хабар бермоқда The New York Times.
Қабристон таҳқирлангани ҳақидаги хабар пайдо бўлиши билан, мусулмонларнинг MPowerChange ва CelebrateMercy ҳуқуқни ҳимоя қилиш ташкилотлари қабристонни қайта тиклаш учун пул йиғишни бошлади. Тўпланиши мақсад қилинган 20 минг доллар пул йиғиш бошланганидан уч соат ўтиб тўплаб бўлинган.
Meduza’нинг қайд этишича, Сент-Луис чеккасидаги Юниверсити-ситида жойлашган яҳудийлар қабристони 1890 йилларнинг охиридан бери фаолият юритади.
«Дарё»нинг Telegram’даги расмий канали — @toshqindaryo’га аъзо бўлинг!
Изоҳ (0)