Ўзбекистонлик зиёратчиларнинг дастлабки гуруҳи Умра амалларини бажариш учун Саудияга учиб кетди

Ўзбекистонлик зиёратчиларнинг 230 нафардан иборат дастлабки гуруҳи 20 февраль куни умра амалларини бажариш учун Саудия Арабистонига учиб кетди.

Дин ишлари бўйича қўмита ахборот хизматининг қайд этишича, гуруҳ таркибидан тўрт нафар ишчи гуруҳи вакили, тўрт нафар ошпаз, икки нафар шифокор ўрин олган.

Хабар беришларича, жорий йил 20 февралидан 11 апрелига қадар ўзбекистонлик фуқароларни умра зиёратига кузатиш ва кутиб олиш режалаштирилган.

Баҳор мавсумида зиёрат 10 кунни ташкил этади. Зиёратчилар Мадина шаҳрида 3 кун, Маккада эса 7 кун бўлади.

Ўзбекистонлик зиёратчилар истиқомат қилишлари учун Мадина шаҳрида Масжиди набавийдан 100—150 метр масофада жойлашган тўрт юлдузли «Нур Мавадда» меҳмонхонаси, Макка шаҳрида эса Ҳарам масжидидан 500—550 метр узоқликдаги «Аброж ал-Кисва» меҳмонхонаси тайёрлаб қўйилган.

Баҳорги умра зиёратида жами 5350 нафар ўзбекистонликнинг «Тошкент—Жидда—Тошкент» йўналиши бўйича 24 та чартер рейсида сафари ташкил этилади.

«Дарё»нинг Telegram’даги расмий канали — @toshqindaryo’га аъзо бўлинг!