Александр Пишур
«Қирол ўлди. Яшасин қирол!» Ўз вақтида Тошкентнинг «Бунёдкор» ва Наманганнинг «Навбаҳор» клублари билан хайрлашган украиналик ҳужумчи фаолиятини Ғузорнинг «Шўртан» клубида давом эттиради.
Пишурга бош мураббий Александр Волков таклиф билан чиққан. «Шўртан» ижроси директори Шоди Намозов украиналик ҳужумчи билан келишиб олганликларини айтган-у, қанчага келишилганига ойдинлик киритилмаган.
Маълумот учун, Пишур январь ойининг сўнгида 36 ёшни қарши олди. Энди шу ёшида Олий лига клублари дарвозасини ишғол қилишга ҳаракат қилади. Футболчининг ўзи фаолиятини неча ёшгача давом эттирмоқчи эканига ойдинлик киритмаган.Артур Геворкян
«Насаф»даги ёрқин фаолиятидан кейин «Локомотив»га етиб келган туркманистонлик ярим ҳимоячи Артур Геворкян Навоийнинг «Қизилқум» клуби билан шартнома тузди. Унинг ёши Пишурникидан 4 ёшга кичик. Шунга қарамай у ҳам меҳмондўст Ўзбекистонни тарк этишни истамаган.
Филип Раевац
«Қўқон—1912» клуби Сербияда қанчалик машҳурлиги аниқ эмас, бироқ жамоадаги сербиялик футболчилар Қўқонда анча машҳур.
Клуб матбуот хизматининг хабар беришича, Филип Раевац отлиқ сербиялик футболчи фаолиятини Қўқон клубида давом эттиради. Шартноманинг қанчага мўлжаллангани ва унинг шартлари борасида маълумотлар йўқ.
Маълум томони Раевац Ҳоким кубоги—2017 мусобақасида 4 та ўйинда майдонга тушиб, 5 та гол уришга муваффақ бўлган. «Sports.ru» маълумотига кўра, Раевац Сербиянинг «ОФК» клубида ўйнаган ва 1992 йилнинг 21 июнида дунёга келган. Бўйи 185 сантиметр, оғирлиги 80 килограмм.
Изоҳ (0)