Жаҳон бокс серияси (WSB)нинг VII мавсум «C» гуруҳи 2-турида Қозоғистоннинг Astana Arlans жамоаси ўз уйида Ўзбекистон боксчиларидан ташкил топган Uzbek Tigers жамоасига қарши баҳс олиб борди. Бешта жанг натижасига кўра ўзбекистонлик боксчилар 1:4 ҳисобида имкониятни бой берди.
Дастлаб енгил – 52 килограммгача бўлган вазн тоифасидаги боксчилар рингга кўтарилди. Унда Аброржон Қодиров рақиби Олжас Саттибаевга 0:3 ҳисобида ютқазди.
-60 килограмм вазнда Рио—2016 бронза медали эгаси Муроджон Аҳмадалиев Зокир Сафиуллинга 0:3 ҳисобида имкониятни бой бериб қўйди.
Жамоалар ўртасидаги учинчи беллашувда -69 килограмм вазндаги боксчилар кучи синашди. Унда Рио–2016 кумуш медали соҳиби Шаҳрам Ғиёсов кутилмаганда 1:2 ҳисобида Асланбек Шимбергеновга мағлуб бўлди.
Ҳеч қандай аҳамият касб этмаган тўртинчи жанг -81 килограмм вазндаги Бектемир Мелиқўзиев ва Нурдаулет Жарманов ўртасида бўлиб ўтди. Ўзбекистон вакили 3:0 ҳисобида зафар қучди.
Ниҳоят, сўнгги беллашувда энг оғир – 91 килограммдан оғир бўлган боксчилар рингга кўтарилди. Баҳодир Жалолов рақиби Камшибек Кункабаев жанг қилди ва 0:3 ҳисобида мағлубиятга учради.
Astana Arlans – Uzbek Tigers 4:1
-52 килограмм: Олжас Саттибаев – Аброржон Қодиров 3:0-60 килограмм: Зокир Сафиуллин — Муроджон Аҳмадалиев 3:0
-69 килограмм: Асланбек Шимбергенов — Шаҳрам Ғиёсов 2:1
-81 килограмм: Нурдаулет Жарманов — Бектемир Мелиқўзиев 0:3
+91 килограмм: Камшибек Кункабаев — Баҳодир Жалолов 3:0
Ушбу гуруҳдан ўрин олган яна бир тўқнашувда Россиянинг Patriot Boxing Team жамоаси иродали тарзда Хитойнинг China Dragons боксчилари устидан 4:1 ҳисобида зафар қучди.
Эслатиб ўтамиз, Uzbek Tigers WSB’нинг 2017 йилги мавсумини China Dragons’га учралган мағлубият билан бошлаган эди. Ўзбекистонлик боксчилар навбатдаги – 3-турни 4 март куни Тошкентда, Россиянинг Patriot Boxing Team боксчиларига қарши баҳс олиб боради.
Маълумот учун, Uzbek Tigers ва Astana Arlans боксчилари бунга қадар икки маротаба куч синашишган. 2016 йили Тошкентда бўлган баҳсда Uzbek Tigers 4:1 ҳисобида зафар қучган. Қозоғистондаги беллашув эса худди шу ҳисобда Astana Arlans ғалаба қозонганди.
«Дарё»нинг Telegram’даги расмий канали — @toshqindaryo’га аъзо бўлинг!
Изоҳ (0)