Буюк Британиянинг кема ва авиация учун жиҳозлар ишлаб чиқарувчи Rolls-Royce Holdingds компанияси рекорд миқдорда — 4,6 миллиард фунт стерлинг (5,7 миллиард доллар атрофида) йиллик зарар кўрганини маълум қилди. Бу ҳақда «Коммерсантъ» хабар бермоқда.
Бу қадар салбий натижага компанияга нисбатан аксилкоррупциявий текширув доирасида қўлланилган жарималар, шунингдек, мамлакатнинг Евроиттифоқдан чиқиши бўйича референдум туфайли фунт стерлинг қиймати тушгани сабаб бўлгани билдирилмоқда.
Шу билан бирга, компания 2016 йил якунлари бўйича тушум миқдорини 9 фоизга — 4, 96 миллиард фунт стерлинггача кўпайтиришга муваффақ бўлди.
Rolls-Royce 17 январь куни 2012 йилдан бери компанияга нисбатан олиб борилаётган аксилкоррупциявий текширувни бартараф этиш борасида Буюк Британия, АҚШ ва Бразилия расмийлари билан келишувга эришганини эълон қилди. Компания жами 671 миллион фунт стерлинг (800 миллион доллардан ортиқ) жарима тўлашига тўғри келди.
Мазкур келишув коррупцияга аралашган компания мансабдорларини таъқиб ва жавобгарликдан озод этмайди. Жумладан, ўтган ҳафтада Британиянинг йирик фирибгарликларга қарши кураш бошқармаси компания собиқ директори Жон Роуз ва яна бир неча ўнлаб ходимни сўроқ қилди.
«Дарё»нинг Telegram’даги расмий канали — @toshqindaryo’га аъзо бўлинг!
Изоҳ (0)