Мўйноқ тумани аҳолисини сифатли ичимлик суви билан таъминлаш чоралари белгиланди

Ўзбекистон Республикаси Президенти Шавкат Мирзиёев қарорига биноан Қорақалпоғистоннинг Мўйноқ тумани аҳолисини сифатли ичимлик суви билан таъминлаш чоралари белгиланди. Бу ҳақда Norma хабар бермоқда.

Ушбу мақсадда жорий йил 1 июлга қадар сув тақсимлаш тармоқларига эга қиймати 26,4 миллиард сўм бўлган «Қўнғирот—Мўйноқ» сув қувурини ишга тушириш лойиҳаси амалга оширилади. Лойиҳани молиялаштириш манбалари сифатида «Ўзкоммунхизмат» агентлигига ажратилган марказлашган инвестициялар (10,4 миллиард сўм), Қорақалпоғистон Республикаси давлат бюджети маблағи (5 миллиард сўм), «Ўзбекистон темир йўллари» АЖ маблағи (5 миллиард сўм) ва хайрия маблағлари (6 миллиард сўм) белгиланган.

2017 йил 1 апрелгача лойиҳа бир вақтнинг ўзида лойиҳа-смета ҳужжатларини ишлаб чиқиш билан бирга амалга оширилади. Махсус қурилиш-монтаж ишларини бажариш учун субпудратчи ташкилотлар тендер савдоларисиз жалб этилади.

Лойиҳа иштирокчиларига солиқ ва божхона тўловларида имтиёзлар кўзда тутилган.

Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.