Қишнинг энг совуқ кунларида қават-қават кийимлар ҳам иситмайди. Шимолда яшовчилар бундай совуққа қандай чидайди ва қайси иссиқ кийимлардан фойдаланади? Биз бу мақоламизда дунёдаги энг иссиқ кийим тўғрисида айтмоқчимиз.
Шимолнинг қаҳратон совуғидан омон қолиш мақсадида одамлар бундай совуққа дош берадиган кийимни ҳам ўйлаб топди. Шимолий қутбда яшовчилар ҳайвонлар терисидан тикилган кийимлар ёрдамида қаҳратон қишнинг изғиринли совуғини енгишга муваффақ бўлди.
Канадада яшовчи эскимосларнинг анъанавий кийими бир-бирининг устидан кийиладиган икки мўйнали костюмдан иборат. Устки костюмнинг мўйнаси ташқарига, ички костюмники эса ичкарига қилиб тикилган. Ҳар бир костюм капюшонли парка, шим, этик ва қўлқопдан ташкил топган. Шундай қилиб, икки қаватли мўйнали костюм бутун танани бошдан оёқ совуқдан ҳимоя қилади.
Эскимослар белбоғ тақмайди, шунинг учун иккала парка ҳам эркин осилиб туради. Бу эса ҳаво айланишини таъминлайди. Этиклар буғу терисидан мўйнаси ташқарига қаратиб тикилади.
Буғу терисидан тикилган кийимнинг яна бир фойдали хусусияти шундаки, агар овчи тасодифан муз остига тушиб кетса танани узоқ вақт сув юзасида ушлаб туришга ёрдам беради.
Изоҳ (0)