Афғонистондаги можаро оқибатида ҳалок бўлган ва жароҳатланганлар сони 2016 йилда 11,5 мингдан ошиқ кишини ташкил этди. Бу БМТ шундай статистикани юритаётган 2009 йилдан бери энг юқори кўрсаткич ҳисобланади, дея хабар беради «ТАСС».
БМТнинг Афғонистонга кўмак миссиясига кўра, ўтган йили 3498 нафар фуқаро ҳалок бўлди, 7920 киши яраланди. Қурбонлар сони 2015 йилга нисбатан 2 фоизга камайди, жароҳатланганлар сони эса 6 фоизга ошди.
Можаро туфайли жабрланган афғон болалари сони 2016 йилда 24 фоизга кўпайди ва 3,5 минг кишини ташкил этди. Уларнинг ярми жангарилар ва ҳукумат кучлари ўртасидаги жанговар ҳаракатлар, қолган ярми эса бомбалар ва бошқа ўқ-дорилар портлаши қурбони бўлди.
Афғонистонда ўтган йили ИШИД фаолияти туфайли ҳалок бўлган ва яраланган тинч аҳоли сони 2015 йилга нисбатан 10 баробар кўпайди.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.
Изоҳ (0)