Ўзбекистон миллий терма жамоаси бош мураббийи Самвел Бабаян «Интерфутбол» газетаси мухбири Камолиддин Алимовга интервью беришга рози бўлди ва суҳбат давомида ўз фалсафаси билан ўртоқлашди.
Журналист биринчи навбатда бу суҳбатни анчадан буён кутаётганини тан олди ҳамда рози бўлгани учун Самвел акага миннатдорчилик билдирди. Кейин эса мухлис ва мутахассисларда саволлар йиғилиб қолгани ҳақида айтиб, Бабаянга ўз саволларини берди.
Тиними йўқ Бабаян
Чиндан ҳам матбуот ва мухлислар билан кам мулоқот қиламан. Бу менинг айбим.Терма жамоа ҳақида кўп ёзишмоқда ва танқид қилишмоқда. Бироқ ҳеч бир фикр чуқур таҳлил натижаси эмас. Бу ҳолат мени ранжитмоқда. Балки журналистлар билан кам гаплашишим бунга сабабдир.
Аслида бунинг ўзига яраша сабаблари бор. Ёрдамчиларим билан футболчилар ҳаракатини доимий равишда таҳлил қиламиз. Сафарларга кўп бораман, бўш вақт деярли қолмайди.
Самвел Бабаян, Ўзбекистон МТЖ бош мураббийи
Маълумот учун, журналистлар билан учрашишга ҳамда уларни қизиқтирган саволларга жавоб беришга вақт топаётган машҳур хорижий мутахассислар ҳам ўз футболчилари ҳаракатини доимий кузатади. Шунингдек, улар ҳам сафарларга бориб туради.
Бабаян тамойиллари
Ҳар бир ўйин — алоҳида тарих, яшаб ўтилган умр. Ана шу шиддатли замон футболида бизнинг танлаган йўлимиз, футбол фалсафамиз бор.Биринчи тамойил — агрессив, яъни, тажовузкор, шунингдек, тезкор, вертикал, ҳужумкор ҳамда прессингга асосланган футбол намойиш қилиш.
Иккинчи тамойил — юқори интеллектуал футбол. Унинг ичига ўйинни ташкил қилиш, футболчиларнинг бир-бирини юқори даражада тушуниши, ўйиннинг боришига қараб тактикаларни ўзгартириш киради.
Учинчи тамойил — миллий терма жамоа манфаати. Яъни, футболчи ўз клуби билан қандай шартномага эга бўлмасин, терма йиғини ва ўйинига келганида терма манфаатларини устун қўйиши шарт. Клуб манфаати ҳеч қачон термадан устун бўлмаслиги керак!
Тўртинчи тамойил — инсоний сифатлар. Бу фақат футболчиларга тааллуқли талаб эмас. Терма жамоа лагерига қадам босган ҳар бир инсон бу талаб ва мажбуриятларга қатъий тарзда амал қилиши шарт. Терма жамоа — бу бир оила.
Самвел Бабаян, Ўзбекистон МТЖ бош мураббийи
Самвел Бабаян Ўзбекистон миллий терма жамоасига шу тамойиллар кераклигини айтган. Бироқ шу асосида футбол ўйнай олмоқдами ёки йўқ, аниқлик киритмаган.
Бабаян оиласи
Ҳа, футболчилар ва ёрдамчиларимга кези келганда жиддий танбеҳ бераман. Лекин бу сўзлардан ҳеч ким ранжимайди. Юқоридаги учта тамойилга жавоб берса-ю, сўнггисига мос келмаса, биз ундай футболчидан воз кечамиз. Бу оиланинг талаблари жиддий.Кейин мен футболчиларнинг айни пайтдаги ҳолати билан ҳисоблашаман. Шундай вазиятлар бўлади, футболчи ўз клубида яхши ўйин намойиш этмаслиги мумкин. Лекин термада аксинча. Бунга Марат Бикмаевни мисол тариқасида келтиришим мумкин. У термада илгари сурилган барча талабга жавоб беради. Иккита ўйинда ўта муҳим голни урди. Аксинча ҳолат ҳам бўлди ва у клуб манфаатини термадан юқори қўйди.
Самвел Бабаян, Ўзбекистон МТЖ бош мураббийи
Клуб манфаатини устун кўриб, терма талабларига қатъий амал қилмаган Марат Бикмаевга нисбатан жазо кўрилган ёки йўқлиги айтилмаган. Нима учун ва қайси ҳолатда клуби учун ҳаракат қилгани очиқланмаган. Марат Бикмаев каби Бабаян тамойилларини бузиб турадиган футболчилар ҳам жамоа учун 2 та гол урса, айби ювилиб кетадими ёки йўқ — маълум эмас.
Бабаян мағлубиятлари
Биз учта муҳим қадам ташладик. Афсуски, икки учрашувда мағлубият аламини тотиб кўрдик. Эрон ва Жанубий Кореяга қарши кечган учрашувларда дуранг адолатли натижа бўларди. Лекин бу ўйинларда омадимиз келмади. Рақиб жамоанинг маҳорати ва тажрибаси ижобий натижа кўрсатишимизга тўсқинлик қилди.Кучлилар кичик хатони ҳам кечирмайди. Жанубий Корея термаси билан ўйинни бир неча маротаба таҳлил қилдим. Умумий ўйин бўйича йигитларга жиддий эътироз йўқ. Фақат айрим вазиятларда концентрацияни йўқотиб қўйишди. Мақсадимиз тўхтаб қолмай, олдинга интилиш. Бизни Сурияга қарши муҳим ўйин кутиб турибди. Рақиб жуда ҳам кучли. Ўз майдонида Эрон ва Кореядан очко тортиб олди. Сурияни саралаш босқичида ўтказган ўйинлари орқали ўрганяпмиз.
Самвел Бабаян, Ўзбекистон МТЖ бош мураббийи
Самвел Бабаян Эрон билан ўйинни ҳам бир неча бор таҳлил қилганми ёки йўқ, аниқлик киритмаган.
Изоҳ (0)