Ўзбекистон Президенти Шавкат Мирзиёев Тошкентнинг Сергели туманида бунёд этиладиган «Тошкент металлургия заводи» хорижий корхонаси қурилиш лойиҳаси билан танишди. Бу ҳақда ЎзА хабар бермоқда.
Лойиҳа қиймати 278 миллион еврони ташкил этган мазкур корхонанинг таъсисчиси Буюк Британиянинг Quality Trade Supplies L.P. компаниясидир.
Умумий ер майдони 100 гектардан иборат бўлган корхонанинг қурилиш ишларини 24 ойда якунлаш режалаштирилган. Заводга Италия, Германия, Австрия каби давлатларда ишлаб чиқарилган илғор ва замонавий ускуналар келтирилади.
Корхонада автомобилларга кузов ишлаб чиқариш учун металл листлар, қурилишда ишлатиладиган турли металл черепицалар, профнастил ҳамда маиший техникалар учун металл листлар тайёрланади.
Корхона тўлиқ қувватда ишга туширилгач, йилига 500 миллион долларлик маҳсулот ишлаб чиқарилиши, 1000 дан зиёд иш ўрни яратилиши кутилмоқда.
Президент ушбу корхона қурилиши бошланиши билан танишди. Мазкур металлургия заводининг Ўзбекистон иқтисодиёти ривожидаги ўрнига тўхталиб, бу ерда ишлайдиган мутахассислар тайёрлашга алоҳида эътибор қаратиш лозимлигини таъкидлади. Пудратчи ва қурувчилар билан суҳбатлашди, ушбу масъулиятли ишда уларга муваффақиятлар тилади.
«Тошкент шаҳридаги Турин политехника университети, Ислом Каримов номидаги Тошкент давлат техника университети ва соҳага ихтисослашган касб-ҳунар коллежларида мазкур корхона учун мутахассислар тайёрлаш кўзда тутилган», — дейилади ЎзА ахборотида.
Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)