Туркманистон президенти Гурбангули Бердимуҳамедов сайловолди кампанияси доирасида 30 январь куни мамлакатнинг Ахал вилоятидаги сайловчилар билан учрашди.
«Chrono-TM»нинг хабар беришича, президентнинг қурувчилар билан суҳбати вақтида, қурувчилардан бири гитара садолари остида президентга қўшиқ куйлаб беришга қарор қилади.
Шундан сўнг гитарани Бердимуҳамедовнинг ўзи қўлга олиб, йиғилганларга биринчи марта Янги йил байрами арафасида куйланган «Бахт нури» номли қўшиғини айтиб берди.
«Туркман давлат хабарлари» давлат агентлиги хабарига кўра, Бердимуҳамедов 8 март — Хотин-қизлар байрами муносабати билан аёллар учун бир неча қўшиқ тайёрлаб қўйган ва бу янгилик «учрашув иштирокчилари учун ҳақиқий кутилмаган совғага айланган».
Маълумот учун, Туркманистонда 2017 йилги президент сайлови 12 февраль куни бўлиб ўтади. Унда, Бердимуҳамедовдан ташқари, яна саккиз киши кураш олиб боради.
2012 йили бўлиб ўтган президент сайловларида Гурбангули Бердимуҳамедов 97 фоиз овоз билан ғолиб чиққан эди.
Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)