АҚШ президенти Дональд Трампнинг Британияга давлат ташрифини бекор қилиш ҳақидаги онлайн-талабнома 1,7 миллиондан ортиқ имзо тўплагани сабаб, Буюк Британия депутатлари 20 февраль куни мазкур масала юзасидан муҳокамалар ўтказади. Бу ҳақда «Газета.ru» хабар бермоқда.
Дебатларда, шунингдек, Трампнинг ташрифини қўллаб-қувватлаш мақсадида очилиб, 100 мингдан ортиқ имзо тўплаган петиция ҳам муҳокама қилинади.
Қайд этишларича, Трампнинг ташрифига қарши петиция тўплаган имзолари сони бўйича Британия тарихидаги иккинчи ўриндаги онлайн-талабномага айланган.
Биринчи ўринда мамлакатнинг Европа Иттифоқидан чиқиши масаласида қайтадан референдум ўтказиш талаби қўйилган петициядир — уни 4 миллиондан ортиқ одам имзолаган.
Аввалроқ Буюк Британия бош вазири Тереза Мэй Британия ва АҚШ ҳамкорликда ишлашни давом эттириши кераклигини таъкидлаб, Дональд Трампга йўлланган Британияга ташриф буюриш таклифи ўз кучида қолишини маълум қилган эди.
Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)