Теннис бўйича «Катта дубулға» туркумига кирувчи Австралия очиқ чемпионатининг эркаклар ўртасидаги яккалик финалида испаниялик Рафаель Надаль швейцариялик Рожер Федерерга қарши кортга тушадиган бўлди.
Бу йўлда Надаль 4 соат 56 минут давом этган ярим финал ўйинини ўтказишига тўғри келди. Бунда унинг рақиби ўзбекистонлик Денис Истоминни турнирдан чиқариб юборган Григор Димитров бўлди ҳамда испаниялик ракетка устаси 6:3, 5:7, 7:6, 6:7, 6:4 ҳисобларида муваффақият қозонди.
Маълумот учун, «Катта дубулға» финалларида Надаль ва Федерер ҳозирга қадар ўзаро 8 бор тўқнаш келган. Шуларнинг 6 тасида Надалнинг қўли баланд келган, яна икки беллашувда Федерер рақибини мағлуб этган. Теннисчилар сўнгги бор «Ролан Гарос—2011» финалида ўзаро кураш олиб борганди.
Қайд этиш керак, Австралия очиқ чемпионатининг аёллар ўртасидаги яккалик беллашувлари финалида америкалик опа-сингил Уильямслар ўзаро кураш олиб боради. Қизиқ томони, улар ҳам «Катта дубулға» финалларида ҳозирга қадар саккиз бор учрашган. Сингил Серена шуларнинг 6 тасида муваффақият қозонган ва опаси Винусга икки бор имкониятни бой берган.
Диққат, диққат! «Дарё»нинг Telegram’даги расмий канали — «Toshqin ‘Daryo’»га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)