Барселона маъмурияти шаҳарда сайёҳлар оқимини чеклашга қарор қилди

Испаниянинг Барселона шаҳри маъмурияти шаҳар марказидаги сайёҳлар оқимини чеклашга қарор қилди. «Газета.ru»нинг ёзишича, бу борадаги режа шаҳар туризм сиёсати кенгаши томонидан ишлаб чиқилган.

Ҳужжатга кўра, Барселона шаҳри ҳудуди тўрт зонага бўлади. Биринчи — тарихий марказ зонасида меҳмонхоналар сони қисқартирилади. Иккинчи зонада эса меҳмонхоналар сони ўзгаришсиз қолдирилади.

Айни вақтда сайёҳларни жойлаштириш учун иккита янги зона ташкил этилади. Барселона маъмурияти янги меҳмонхоналарни шаҳар чеккасида қуришни таклиф қилмоқда, марказда эса қурилиш тақиқланади.

Бундан ташқари, шаҳар маъмурияти сайёҳларни жойлаштириш учун олинадиган лицензияларни беришни ҳам тақиқлаб қўйган.

Маъмуриятнинг ушбу қарори ҳам шаҳар аҳолиси томонидан, ҳам сайёҳлик тармоғи вакиллари томонидан кескин танқид остига олинган.

Уларнинг фикрича, бу ташаббуслар шаҳар иқтисодиётига, янги иш ўринларни ташкил этиш сиёсатига зарар етказади, инвесторларни қўрқитиб, ҳуқуқий тушунмовчиликни келтириб чиқаради.

2014 йил маълумотларига кўра, туризм соҳаси Барселона ҳудудий ички маҳсулоти ҳажмининг 12 фоизини ташкил этган.

Айни вақтда, The Guardian нашрининг ёзишича, 1,6 миллион киши истиқомат қиладиган бу шаҳарга 2016 йил давомида 32 миллион киши келиб-кетган.

Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.