Трампнинг маслаҳатчиси: Россияга қарши қаратилган санкцияларни бекор қилиш масаласини кўриб чиқяпмиз

Россияга қарши унинг Украина инқирозидаги роли сабаб жорий этилган санкцияларни бекор қилиш имкониятлари кўриб чиқилмоқда, дея хабар берди Meduza.

Бу ҳақда АҚШ президенти Дональд Трампнинг маслаҳатчиси Келлиэнн Конуэй Fox News телеканалига берган интервьюсида айтиб ўтган.

27 январь куни бир қатор америкалик журналистлар Трамп маъмуриятидаги манбаларга асосланиб, Россияга қарши санкцияларни бекор қилиш бўйича қонун лойиҳаси тайёрланаётгани ҳақида ижтимоий тармоқларда маълум қилди.

28 январь куни Трамп АҚШ президенти лавозимига киришганидан кейин биринчи марта Россия президенти Владимир Путин билан телефон орқали суҳбатлашиши кутилмоқда.

Россия президентининг матбуот котиби Дмитрий Песков ОАВда пайдо бўлган санкцияларни бекор қилиш ҳақидаги хабарларга муносабат билдираркан, Кремлдагилар мазкур ахборотнинг ҳақиқатга қанчалик яқин эканини билмаслигини айтиб ўтди.

Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.