Ислом Каримов ҳайкалини яратиш бўйича халқаро ижодий танлов низоми эълон қилинди

Ўзбекистон Республикасининг Биринчи Президенти Ислом Абдуғаниевич Каримов сиймоси тасвирланган ҳайкални яратиш бўйича халқаро ижодий танлов низоми эълон қилинди.

Халқаро ижодий танловнинг асосий мақсади Ўзбекистон Республикасининг Биринчи Президенти Ислом Абдуғаниевич Каримов сиймоси тасвирланган ҳайкални яратиш бўйича ишлаб чиқилган энг яхши лойиҳани танлаб олишдир.

Ижодий танлов бир босқичда ўтказилади. Унда ҳайкалтарошлар, архитекторлар иштирок этиши мумкин. Танловнинг бошланиш санаси оммавий ахборот воситаларида танлов шартлари эълон қилинган кундан сўнг аниқланади.

Танлов натижаларини ҳакамлар ҳайъати тақдим этади. Ҳакамлар ҳайъати таркиби Ўзбекистон Республикаси Вазирлар Маҳкамаси томонидан тузилади ва тасдиқланади. Танлов натижалари ташкилий қўмита ҳамда Ўзбекистон Бадиий академияси сайтида эълон қилинади.

Халқаро ижодий танлов ғолиблари танлов натижаларига кўра мукофот топшириш маросимига таклиф этилади. Ғолибларнинг йўл харажатлари ташкилий қўмита томонидан қопланади.

Низомда Самарқанддаги ёдгорлик ўрнатиладиган жой чизмаси: ажратилган майдон ва унинг атрофи фотосурати, ҳудуднинг асосий режаси кўрсатиб ўтилган.

Танлов ишлари ҳакамлар ҳайъатига танишиш учун 2017 йил 31 мартгача қуйидаги манзилга юборилади: Тошкент шаҳри, 100029, Ш.Рашидов кўчаси, 40-уй. Ўзбекистон Бадиий академиясининг бадиий кўргазмалар дирексияси. Марказий кўргазмалар зали.

Телефон ва факс: (99871) 252-26-50, 256-51-45.

Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.