Ўзбекистон Президенти Шавкат Мирзиёев 20—21 январь кунлари Қорақалпоғистон Республикасида бўлди, дея хабар бермоқда ЎзА.
Ўзбекистоннинг барча ҳудудлари каби Қорақалпоғистонда ҳам кенг кўламли бунёдкорлик ишлари амалга оширилмоқда. Нукус шаҳрида кўп қаватли уйлар, замонавий инфратузилма объектлари барпо этилмоқда.
Шавкат Мирзиёев Нукусдаги Ерназар Олакўз кўчасини реконструкция қилиш лойиҳаси билан танишди. Режага кўра, ушбу марказий кўча кенгайтирилиб, транспорт ҳаракати учун янада қулайлик яратилади. Йўл бўйида кўп қаватли уйлар, савдо ва маиший хизмат кўрсатиш шохобчалари қурилади.Ўзбекистон Президенти Тошкент педиатрия тиббиёт институтининг Нукус филиалида ҳам бўлди. Бу ерда кўп тармоқли болалар клиникаси, ўйин майдончаси, меҳмонхона бунёд этилмоқда.
Институтда ҳақиқий илмий муҳит яратиш, хориж тажрибасини ўрганиш, халқаро клиникалар билан ҳамкорликни ривожлантириш, оналар ва болалар саломатлигини самарали муҳофаза қилиш бўйича тавсиялар берилди.
Ўзбекистон Президенти Шавкат Мирзиёев Қорақалпоғистонга ташрифи давомида реконструкция қилиниб, фойдаланишга топширилган Нукус темир йўл вокзалини бориб кўрди.
Бу ерда йўловчилар учун қўшимча қулайликлар яратиш, хизмат турларини кўпайтириш ва хизмат кўрсатиш маданиятини янада ошириш зарурлигини таъкидлади.Шунингдек, Шавкат Мирзиёев Имом Эшон Муҳаммад масжидида нуронийлар билан суҳбатлашди. Унда кексаларни эъзозлаш, ёшлар тарбияси ҳақида сўз борди.
Шу билан Ўзбекистон Республикаси Президенти Шавкат Мирзиёевнинг Қорақалпоғистон Республикасига ташрифи ниҳоясига етди.
Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)